იუსტიციის მინისტრის, თეა წულუკიანის განცხადებით, მას არ მოსწონს მოსამართლე ლევან მურუსიძის მუდმივ მოსამართლედ გამწესება. მისივე თქმით, თავისი პოზიციის მიუხედავად, იუსტიციის უმაღლესი საბჭოს გადაწყვეტილებაში არ ერევა:

"რაც შეეხება ბატონი ლევან მურუსიძის გუშინ გამუდმივებას, მან სრულიად სწორად ბრძანა, რომ არც მანამდე მომწონდა მისი მოსამართლეობა და მითუმეტეს არც ახლა მომწონს მისი გამუდმივება, თუ ვინმე სუბიექტურ აზრს მეკითხება", — აღნიშნა წულუკიანმა.

მოსამართლე ლევან მურუსიძე იუსტიციის უმაღლესმა საბჭომ სააპელაციო სასამართლოში უვადოდ გაამწესა. მურუსიძის უვადო მოსამართლეობას საბჭოს უმრავლესობამ, 11 წევრმა დაუჭირა მხარი. ლევან მურუსიძის სახელს არაერთი გახმაურებული საქმე უკავშირდება. მათ შორისაა, სანდრო გირგვლიანის, სულხან მოლაშვილის, გიორგი მიქიაშვილისა და ე.წ. მეამბოხე მოსამართლეების საქმეები. სტრასბურგის სასამართლომ ყველა ამ საქმეში სახელმწიფო გაამტყუნა და ქართული სასამართლო გააკრიტიკა. მურუსიძის მიღებულმა გადაწყვეტილებებმა სახელმწიფო ჯამში 83 000 ევროთი აზარალა.

მას შემდეგ, რაც ქართული ოცნება ხელისუფლებაში მოვიდა, სამართლიანობის აღდგენა დააანონსა. ყოფილმა პრემიერ-მინისტრმა, ბიძინა ივანიშვილმა მურუსიძე, რომელიც მაშინ იუსტიციის უმაღლესი საბჭოს მდივანი იყო, "დამოუკიდებელი სასამართლოს აღორძინებაში მის თანამონაწილედ გამოაცხადა".

"მინდა ხაზი გავუსვა, რომ ლევანი გახლავთ დემოკრატიული წესით არჩეული იუსტიციის საბჭოს მდივანი. აღმოვაჩინე ამ ახალგაზრდაში ხანგრძლივი საუბრის შემდგომ, რომ განწყობილია, ყოველგვარი გავლენისგან გაათავისუფლოს სასამართლო და ჭეშმარიტად დამოუკიდებელი სასამართლოს აღორძინებაზე იფიქროს, იზრუნოს. ამას იღებს საკუთარ თავზე, ჩვენი ხედვები ემთხვევა ერთმანეთს. ჩემი აზრით, ამ ახალგაზრდა კაცს პრინციპული ხედვები აქვს, რომ სასამართლო იყოს ღირსეული და შესატყვისი ევროპულისა", – განაცხადა ივანიშვილმა.

2015 წელს ბიძინა ივანიშვილმა გადაცემა 20/30–ში საუბრისას განაცხადა, რომ სანდრო გირგვლიანი იყო "არა კონკრეტული მოსამართლის, არამედ სისტემის მსხვერპლი".

გაიგეთ მეტი: