პაატა ბურჭულაძის პარტიის საარჩევნო ბლოკში შემავალი ახალი მემარჯვენეების ლიდერი მამუკა კაციტაძე On.ge-სთან საუბარში აცხადებს, რომ ბურჭულაძის დაპირება სოციალური დახმარების მიმღებ მოქალაქეთა რაოდენობის გაორმაგების შესახებ მექანიკური უზუსტობა იყო და ბურჭულაძე, სინამდვილეში, ორჯერ მეტი სოციალური დახმარების გაღებას გულისხმობდა:

"იცით რა არის, რაზედაც ხედავთ, რომ ტექნიკური ან მექანიკური უზუსტობა იყო, მაგაზე განსაკუთრებული ყურადღების გამახვილება არ არის საჭირო.

პირდაპირ გეუბნებით, აქ იყო ლაპარაკი იმაზე, რომ ჩვენ შეგვიძლია 2-ჯერ მეტი სოციალური დაფინანსება გავიღოთ. ეს არის და ეს. რიცხვებით მანიპულირება არ არის საჭირო".

კითხვებს, არის თუ არა ეს შეთავაზება რეალური და ექნება თუ არა ბიუჯეტს ამის საშუალება, მამუკა კაციტაძემ აღარ უპასუხა.

გუშინ პაატა ბურჭულაძემ განაცხადა, რომ ხელისუფლებაში მოსვლის შემთხვევაში, იმ ადამიანების რიცხვს გაზრდის, რომლებიც სოციალურ დახმარებას იღებენ:

"ჩვენ გვაქვს გეგმა, რომ დღეს სოციალური დახმარება ეძლევა 500 000 ადამიანს, ჩვენ ამას გავხდით ერთ მილიონს".

ბურჭულაძის პარტია, გირჩი, ახალი საქართველო და ახალი მემარჯვენეები 18 აგვისტოს გაერთიანდნენ. On.ge ცდილობს მოიპოვოს ბურჭულაძის პარტიის ბლოკში შემავალი სხვა პარტიული ლიდერების შეფასებები აღნიშნულ საარჩევნო დაპირებაზე.