მცხეთის მუნიციპალიტეტის მერის წარმომადგენელი ქრთამის აღების ბრალდებით დააკავეს. ფინანსთა სამინისტროს საგამოძიებო სამსახურის ინფორმაციით, მან მოქალაქეს პრობლემის მოგვარების სანაცვლოდ 2 000 აშშ დოლარი მოსთხოვა.

უწყების განცხადებით, ბრალდებული მოქალაქეს სახელმწიფო საკუთრებაში არსებული მიწის ნაკვეთის აუქციონის წესით გასხვისებასთან დაკავშირებულ პროცედურებში ხელშეწყობას დაპირდა. მათი თქმით, მერის წარმომადგენელმა წინასწარ 1 000 აშშ დოლარი აიღო.

საქმეზე გამოძიება საქართველოს სისხლის სამართლის კოდექსის 338-ე მუხლის პირველი ნაწილით მიმდინარეობს, რაც სასჯელის სახით ითვალისწინებს თავისუფლების აღკვეთას 6-დან 9 წლამდე ვადით.