გაერთიანებული ოპოზიციის ლიდერი, კობა ხაბაზი პროტესტის ნიშნად ცენტრალურ გზაზე გაწვა. ვიდეოს ტვ პირველი ავრცელებს.

"ჩემს ისტორიაში ეს განმეორდა. 8 აპრილს ჩავწექით პირველი ჯგუფი ჯავშანტრანსპორტიორების წინ და მაშინ შევაჩერეთ რუსის ჯარი. სამწუხაროდ, მეორე დღეს ტანკებით წამოვიდნენ და ვერ შევძელით შეჩერება. სამწუხაროდ, ჩემს ცხოვრებაში ეს მეორედ განმეორდა. უბრალოდ, სამწუხაროა, რომ მოღალატე, საქართველოს მტრის სალომე ზურაბიშვილის პრეზენტაციის გამო, ქართული პოლიცია აკეთებს ამას, გვიკეტავენ გზას, გამოჰყავთ ზონდერები, ცდილობენ, ხელი შეგვიშალონ და დაგვარბიონ. ეს არის სამარცხვინო ხელისუფლება", - განაცხადა კობა ხაბაზმა.

თელავში აქციის მოსაწყობად მიმავალ ოპოზიციას პოლიციამ გზა გადაუკეტა. არის დაპირისპირება პოლიციასა და მოქალაქეებს შორის. აქციის მონაწილეები ცდილობენ პოლიციის მანქანები ხელით გაწიონ. ისინი გზის გახსნას ითხოვენ.

შსს ამბობს, რომ გაერთიანებული ოპოზიციის აქციის მონაწილეებს ჯერ ალტერნატიული გზა, შემდეგ კი თელავამდე ტრანსპოტირება შესთავაზეს.

შინაგან საქმეთა სამინისტროს განცხადებით, აქციის ორგანიზატორებს, სატრანსპორტო საშუალებების მრავალრიცხოვანი ნაკადიდან გამომდინარე, შეთავაზებული ჰქონდათ თელავის მიმართულებით მოძრაობის უსაფრთხო მარშრუტი.