საქართველოს მომავალი პრეზიდენტის, სალომე ზურაბიშვილის ადმინისტრაციის მომავალი უფროსის, ლაშა ჟვანიას განცხადებით, დღეს კახეთში ისტორიული დღეა და დაპირისპირების დრო არ არის.

მისივე თქმით, ყველაფერი მზადაა, რომ ცერემონიაზე არა მხოლოდ 1800-ს, არამედ უფრო მეტ სტუმარს უმასპინძლონ.

“დღევანდელ დღეს პროტესტი ნაკლებად უხდება, ყველაზე მნიშვნელოვანია ვიფიქროთ, რომ ეს ჩვენი გახლეჩილი და გაყოფილი საზოგადოება როგორ გავართიანოთ და ეს იქნება პრეზიდენტის მთავარი პრიორიტეტი, რომ გააერთიანოს საზოგადოება”, — განაცხადა ლაშა ჟვანიამ.

მისივე თქმით, დღეს საქართველოს მომავალი პრეზიდენტი ფიცს ახაკ კონსტიტუციაზე დადებს, რომელიც ასევე დღეს შევა ძალაში.

მან კიდევ ერთხელ განმარტა, რომ პრეზიდენტის ინაუგურაციაზე სტუმრები ფეხზე პატარა ადგილის გამო იდგებიან.

ახალარჩეული პრეზიდენტი სალომე ზურაბიშვილი დღეს ფიცს დადებს, რის შემდეგაც საპრეზიდენტო უფლებამოსილებების განხორციელებას შეუდგება.

კონსტიტუციის თანახმად, თანამდებობის დაკავების წინ საქართველოს ახალარჩეული პრეზიდენტი საპროგრამო სიტყვას წარმოთქვამს და დებს ფიცს. ახალარჩეული პრეზიდენტის მიერ ფიცის დადებისთანავე უფლებამოსილება შეუწყდება გიორგი მარგველაშვილს.

ინაუგურაციაზე საქართველოს ჰიმს სამების მგალობელთა გუნდი შეასრულებს, ხოლო კახურ მრავალჟამიერს ანსამბლი ერისიონი, შვიდკაცა და ქართული ხმები.

სალომე ზურაბიშვილის ინაუგურაცია თელავში, ერეკლე მეორის სასახლეში, 15 საათზე დაიწყება და 40 წუთს გაგრძელდება. მოსახლეობას საშუალება ექნება ინაუგურაციას თვალი ვაჟა- ფშაველას სახელობის თეატრის წინ დამონტაჟებულ მონიტორზე ადევნოს.

დღესვე სალომე ზურაბიშვილი მოწვეულ სტუმრებთან ერთად, 16 საათზე, ვაჟა-ფშაველას სახელობის დრამატულ თეატრში საზეიმო მიღებას გამართავს.

პარალელურად, გაერთიანებული ოპოზიციის აქციაა დაგეგმილი თელავში. გუბერნატორის თქმით, მათთვის თელავის ერთ-ერთი ცენტრალური მოედანია გამოყოფილი. ოპოზიცია არჩეული პრეზიდენტის ლეგიტიმაციას ეჭვქვეშ აყენებენ და ითხოვენ ვადამდელ საპარლამენტო არჩევნების ჩატარებას. მიუხედავად იმისა, რომ ინაუგურაციის მიმდებარე ტერიტორიას პოლიცია იცავს, ოპოზიციას აქციის გამართვა მაინც ერეკლე მეფის ძეგლთან უნდა. პოლიციამ ოპოზიციის კოლონა ყვარელთან გააჩერა და თელავში არ უშვებს. დაპირისპირებაა პოლიციასა და გაერთიანებულიო ოპოზიციის მხარდამჭერებს შორის.