მთავრობის დათმობების მიუხედავად ე.წ. ყვითელჟილეტიანები ისევ პარიზის ქუჩებში გავიდნენ. ხუთი კვირაა, რაც პარიზი პროტესტმა მოიცვა. პოლიციის ინფორმაციით, დაკავებულია 120 ადამიანი, რაც წინა კვირებთან შედარებით რამდენჯერმ ნაკლებია.

მთელი ქვეყნის მასშტაბით 70 ათასამდე პოლიციელი იყო მობილიზებული. ე.წ. ყვითელჟილეტიანები თავიდან საწვავზე ფასის ზრდას აპროტესტებდნენ, თუმცა მათი მოთხოვნები შეიცვალა და ახლა განათლების რეფორმას ითხოვენ.

მთელი ქვეყნის მასშტაბით აქციაში 33 ათასზე მეტმა ადამიანმა მიიღო მონაწილეობა. პარიზში 3 ათასი დემონსტრანტი შეიკრიბა, როცა წინა კვირას იყო 8 ათასი.

ფოტო: Zakaria Abdelkafi / AFP / Getty Images

სტრასბურგში საახალწლო ბაზრობაზე თავდასხმის შემდეგ საფრანგეთის ხელისუფლება მოუწოდებს აქციის მონაწილეებს, რომ პროტესტი შეწყვიტონ, თუმცა უშედეგოდ.

შაბათის აქციის დროს იყო რამდენიმე დაპირისპირება პოლიციასა და დემონსტრანტებს შორის. სამართალდამცავებმა ცრემლსადენი გაზი გამოიყენეს. რამდენიმე მაღაზია და მუზეუმი დაკეტილი იყო, თუმცა ლუვრი და ეიფელი მუშაობას აგრძელებდნენ.

11 დეკემბერს საფრანგეთის პრეზიდენტი, ემანუელ მაკრონი დათმობაზე წავიდა და მოსახლეობას ქვეყანაში მინიმალური ხელფასის გაზრდასა და გადასახადების შემცირებას დაპირდა. მაკრონმა აღნიშნული განცხადება ქვეყანაში რამდენებიმეკვირიანი აქციისა და არეულობის შემდეგ გააკეთა. 2019 წლიდან მინიმალური ხელფასი 100 ევროთი გაიზრდება.

ტელევიზიით გამოსვლის დროს პრეზიდენტმა აღიარა, რომ აღშფოთებისა და უკმაყოფილების გრძნობა, რომელიც პროტესტის მონაწილეებს აქვთ, ხშირ შემთხვევაში სამართლიანია.

მან, ასევე, განაცხადა, რომ დაგეგმილი ცვლილება, დაბალშემოსვალიანი პენსიონერებისთვის გადასახადის გაზრდა და ზეგანაკვეთურის დაბეგვრა, აღარ იქნება. ხოლო დამქირავებლები სტიმულირებული იქნებიან იმისკენ, რომ წლის ბოლოს თანამშრომლებს პრემია გადაუხადონ, რომელიც ასევე არ დაიბეგრება. თუმცა მაკრონმა უარი თქვა გადასახადი გაეზარდა მდიდრებისთვის და აღნიშნა, რომ ეს ეკონომიკას შეასუსტებს მაშინ, როცა სამუშაო ადგილებია შესაქმნელი.

ე.წ. ყვითელჟილეტიანების პროტესტთან დაკავშირებით მაკრონი ხმამაღალი განცხადებების გაკეთებას ერიდებოდა, თუმცა სატელევიზო მიმართვაში მან აღნიშნა, რომ ბევრი საკუთარი ცხოვრების დონით უკმაყოფილოა.

"აღნიშნული სიტუაციის შექმნის გამო პასუხისმგებლობის ნაწილს საკუთარ თავზე ვიღებ. შეიძლება, მე ვქმნიდი შთაბეჭდილებას, რომ სხვა რამე მანაღვლებს, რომ სხვა პრიორიტეტები მაქვს. ვიცი, რომ ბევრ თქვენგანს ჩემი სიტყვები აწუხებს", — განაცხადა მაკრონმა.

მისივე თქმით, ქვეყანაში ეკონომიკისა და სოციალურ სფეროებში საგანგებო სიტუაციები შეიქმნა და ამის გამოსასწორებლად რეგიონების მერებს შეხვდება.

2019 წელს კი საწვავზე ფასი კიდევ ერთხელ უნდა გაზრდილიყო, რამაც გააბრაზა ე.წ. ყვითელჟილეტიანები — ასეთი ჟილეტი საფრანგეთის ნებისმიერმა მძღოლმა მანქანაში უნდა იქონიოს.

საპროტესტო აქციებში ათი ათასობით ადამიანი იღებდა მონაწილეობას. დემონსტრანტები არბევდნენ პარიზის ქუჩებს, მაღაზიებსა და კულტურულ ძეგლებს, ცეცხლს უკიდებდნენ მანქანებსა და საბურავებს. ვანდალური დარბევის მსხვერპლი გახდა ტრიუმფალური თაღიც. პოლიცია დემონსტრანტების დასაშლელად იყენებდა ცრემლსადენ გაზსა და წყლის ჭავლს.

თავდაპირველად საფრანგეთის ხელისუფლება ამბობდა, რომ საწვავზე ფასის ზრდა აუცილებელი იყო, რადგან ეს ხელს შეუწყობდა ეკოლოგიურ მდგომარეობას და ფრანგები კერძო მანქანებიდან საზოგადოებრივ ტრანსპორტზე გადავიდოდნენ. თუმცა 6 დეკემბერს ხელისუფლებას დათმობაზე წასვლა მაინც მოუწია და თავის გეგმაზე უარი თქვა.