ავიაკომპანა Georgian Airways-მა On.ge-ს მიერ გავრცელებული ინფორმაციის შემდეგ დროებით ფრენებიდან მოხსნა ის მფრინავი, რომელიც რუს ავიამეთვალყურეებს "საყვარელი დიდი მოსკოვით" მიმართავდა. კომპანიამ ამ გადაწყვეტილების შესახებ ოფიციალური განცხადება არ გაავრცელა და ტელეკომპანია იმედთან სატელეფონო კომუნიკაციით შემოიფარგლა.

Georgian Airways-ის დირექტორი, გივი დავითაშვილი იმედთან სატელეფონო კომენტარში აცხადებს, რომ მიმდინარეობს საქმის განხილვა და შესაბამისი უწყებები მიიღებენ გადაწყვეტილებას. დავითაშვილის თქმით, მისთვის კატეგორიულად მიუღებელია მფრინავის ავიამეთვალყურესთან საუბრის შინაარსი.

როგორც On.ge-ს კომპანიის ციფრული კომუნიკაციების მენეჯერმა უთხრა, ოფიციალური განცხადების გავრცელებას არ გეგმავენ და მედიამ იმ კომენტარით უნდა ისარგებლოს, რაც გენერალურმა დირექტორმა იმედს მისცა. მენეჯერმა აღნიშნა, რომ On.ge-სთვის კომენტარის მიცემიც საკითხს დირექტორთან შეათანხმებდა.

გუშინ, 11 დეკემბერს, მას შემდეგ, რაც On.ge-მ ქართველი მფრიანვისა და რუსი ავიამეთვალყურის საუბრის ჩანაწერი გაავრცელა კომპანიაში განაცხადეს, რომ ექნებოდათ "შესაბამისი რეაგირება", თუმცა არ დაუკონკრეტებიათ ამაში რა იგულისხმებოდა.

გაიგეთ მეტი: Georgian Airways-ის პილოტის საბჭოთა ნოსტალგია