კრიტიკის ატანა თითქმის ყველა ადამიანს უჭირს, მითუმეტეს, თუ შენიშვნას უხეშად და უტაქტოდ აძლევენ.

შეცდომის აღიარება პიროვნებისთვის ერთ-ერთი ყველაზე მძიმე პროცესია და ამ საქმეს გარეშე პირის მითითებები თუ შენიშვნები კიდევ უფრო ართულებს. ამიტომ მნიშვნელოვანია, ჩვენს მეგობრებსა თუ თანამშრომლებს ჩვენი მოსაზრებები რაც შეიძლება რბილად და სათუთად მივაწოდოთ. თქვენ შეიძლება გეგონოთ, რომ თქვენი კრიტიკა კონსტრუქციულია და გაგიკვირდეთ კიდეც, რატომ წყინთ ადამიანებს თქვენი უკუკავშირი. საქმე ისაა, რომ თითოეული ადამიანი სხვადასხვაგვარად აღიქვამს მიღებულ ინფორმაციას.

დაძაბულობისა და გაუგებრობის თავიდან ასაცილებლად, ჩვენ გთავაზობთ რამდენიმე რჩევას და კონსტრუქციული კრიტიკის ტექნიკას.

1. შეაფასეთ ნამუშევარი და არა პიროვნება

ვიდრე ნამუშევარზე აზრს გააზიარებთ დარწმუნდით, რომ თქვენი აზრი პიროვნების მიმართ დამოკიდებულებით არ არის განპირობებული. რა თქმა უნდა კრიტიკა ზოგადად სუბიექტურია, მაგრამ ერთია კონკრეტული ნაშრომის შეფასება და მეორე ადამიანის განსჯა.

ამიტომ გამიჯნეთ ერთმანეთისგან თქვენი პირადი და საქმიანი დამოკიდებულება. კონცეტრირდით კონკრეტულ საკითხებზე, რომლებზეც გინდათ შენიშვნის მიცემა და დარჩით თემის ფარგლებში. ნუ მისცემთ თავს იმის საშუალებას, რომ ეს მომენტი პიროვნების განსასჯელად გამოიყენოთ.

2. იყავით პოზიტიური

გახსოვდეთ, კრიტიკის უმთავრესი მიზანია გამოსწორდეს შეცდომა და ადამიანმა მიიღოს გამოცდილება, რათა შემდეგში უკეთესი შედეგი დადოს.

თუ დასტრესილი ხართ, ვინმე სხვამ მოგიშალათ ნერვი, პირადი პრობლემა გაქვთ ან უბრალოდ ცუდ ხასიათზე ხართ, ნუ იყრით ჯავრს ადამიანზე, რომელიც თქვენთან თანამშრომლობას საჭიროებს. იმისთვის რომ მიიღოთ სასურველი შედეგი და საქმე გაკეთდეს საჭიროა პრობლემის თავის დროზე იდენტიფიცირება და მისი სწორი მიმართულებით წაყვანა.

პოზიტიური კრიტიკა მაინც და მაინც ქებას არ ნიშნავს. უბრალოდ საჭიროა კონკრეტულ პრობლემაზე კონცენტრირდეთ, ჩამაყალიბოთ თქვენი პრეტენზია გასაგებად და არ ეჩხუბოთ პიროვნებას დაშვებული შეცდომის გამო. აგრესიით თქვენი თანამშრომელი ან მეგობარი აუცილებლად დაისტრესება და შესაბამისად, თითონაც დაკარგავს კონცენტრაციას.

3. გამოიყენეთ "სენდვიჩის პრინციპი"

სენდვიჩის პრინციპი ერთ-ერთი ყველაზე ცნობილი ხერხია კრიტიკული აზრის გასაზიარებლად.

ამ ხერხის მიხედვით კრიტიკული აზრი, ორ პოზიტიურ შეფასებას შორის უნდა მოაქციოთ. ასეთ შემთხვევაში თქვენს თანამშრომელს ან მეგობარს გაუადვილდება მიიღოს შენიშვნა და არ დარჩება ნაწყენი.

მხოლოდ ნეგატიური უკუკავშირითა და შენიშვნებით პიროვნება შეიძლება დაითრგუნოს, რაც საბოლოო ჯამში მის მუშაობაზეც აისახება. ამიტომ მიაწოდეთ ჯერ პოზიტიური შეფასება, შემდეგ კონკრეტული შენიშვნა და ბოლოს დაამთავრეთ ისევ პოზიტივით.

შეიძლება ნაშრომი საერთოდ არ მოგეწონოთ, მაგრამ აუცილებლად გამონახეთ რამე, რის შექებასაც შეძლებთ. მაგალითად, ორიგინალურობა, დავალების შესრულების სისწრაფე, შემართება და ა.შ.

4. მიაწოდეთ შეფასება და არა ინსტრუქცია

თუ თავად სპეციალისტი არ ბრძანდებით, ნუ გასცემთ ინსტრუქციას როგორ გამოასწოროს შეცდომა თქვენმა თანამშრომელმა.

მაგალითად, ნუ ეტყვით დიზაინერს, რომ ლოგო გაადიდოს, უთხარით, რომ გინდათ უფრო შესამჩნევი იყოს.

ნუ შეეცდებით პრობლემის გამოსწორებას, თქვენი მიზანია პრობლემის აღმოჩენა და გამოკვეთა. უთხარით მათ რა არ მოგწონთ (ზემოთ აღწერილი ხერხების გამოყენებით) და მიეცით საშუალება თავად გადაჭრან ახალი ამოცანა.

5. "კარგია, მაგრამ უკეთესიც შეიძლება"

ეს ზოგადი სიტყვები არასოდეს გამოიყენოთ.

კონცენტრირდით მთლიანად პოზიტივზე. აღწერეთ და შეაქეთ ნაშრომის მხოლოდ ის ნაწილი, რომელიც მოგწონთ. თქვით რა მოგწონთ, რატომ მოგწონთ, ვრცლად ისაუბრეთ კარგ და დამაკმაყოფილებელ ნაწილებზე. შემდეგ გადადით იმ მხარეზე, რომელიც ნაკლებად ან საერთოდ არ მოგწონთ და თქვით: "მომწონს, მაგრამ აი, ეს, რომ ასე იყოს/არ იყოს, უფრო მომეწონებოდა." აქაც კონკრეტული და ჩამოყალიბებული შეფასება გააკეთეთ.

ვიმედობვნებთ, რომ ეს რჩევები გამოგადგებათ ყოველდღიურ და სამსახურეობრივ ურთიერთობებში. იზრუნეთ, რომ სამუშაო პროცესი სასიამოვნო და პროდუქტიული გახდეს როგორც თქვენთვის, ასევე თქვენი თანამშრომლებისთვის.