ბარნოვის ქუჩაზე 25 წლის თამარ გამრეკელაშვილის მკვლელობისთვის ბრალდებულს, ვეფხია ბაქრაძეს უვადოდ თავისუფლების აღკვეთა მიესაჯა. მოსამართლემ განაჩენი დღეს, 10 დეკემბერს გამოაცხადა. საქმის განხილვა დახურულ რეჟიმში მიმდინარეობდა.

13 აპრილს, თბილისში, ბარნოვის ქუჩაზე, 25 წლის გოგოს შვილების თანდასწრებით ყელი გამოჭრეს. ის ადგილზევე გარდაიცვალა.

თბილისის საქალაქო სასამართლოს განცხადებით, დახურულ სასამართლო სხდომებზე თავი არ ცნო დამნაშავედ წარდგენილ ბრალდებებში, კერძოდ ,განსაკუთრებული სისასტიკით ჩადენილ განზრახ მკვლელობაში, სიცოცხლის მოსპობის მუქარაში, ნივთის დაზიანებასა და სისტემატურ ცემაში, რამაც დაზარალებულის ფიზიკური ან ფსიქიკური ტანჯვა გამოიწვია, მაგრამ არ მოყოლია ამ კოდექსის 117-ე ან 118-ე მუხლით გათვალისწინებული შედეგი. ვეფხია ბაქრაძეს დანაშაულთა ერთობლიობით და შთანთქმის პრინციპის გამოყენებით, საბოლოოდ სასჯელის სახედ და ზომად უვადო თავისუფლების აღკვეთა შეეფარდა.

გარდა ამისა, სასამართლო გამამტყუნებელი განაჩენი გამოიტანა ბაქრაძის ნათესავის, თეიმურაზ ბ.-ს მიმართა, რომლის სახლშიც, თელეთში დააკავეს ბაქრაძე. მას განსაკუთრებით მძიმე დანაშაულის შეუტყობინებლობისთვის სასჯელის სახედ და ზომად ორი წლით თავისუფლების აღკვეთა შეეფარდა.