იტალიაში მომხდარი მიწისძვრის შედეგად გარდაცვლილთა რიცხვი 267-მდე გაიზარდა, 400 ადამიანი კი ამ დრომდე საავადმყოფოში იმყოფება. ამასთან, მიწისძვრის შედეგად დაზარალებულ რეგიონებში საგანგებო მდგომარეობაა გამოცხადებული. ინფორმაციას ამის შესახებ Reuters ავრცელებს.

იტალიის ცენტრალურ ნაწილში 6,2 მაგნიტუდის სიმძლავრის მიწისძვრა 24 აგვისტოს მოხდა. გადარჩენილი ადამიანების ნაწილმა გასული ღამე მანქანებში და კარვებში გაატარა. პირველი ბიძგების შემდეგ 5,1 და 5,4 სიმძლავრის მიწისძვრები კიდევ დაფიქსირდა.

მიწისძვრის ეპიცენტრი რომიდან 100 კილომეტრის დაშორებით დაფიქსირდა. ყველაზე მეტი გარდაცვლილი სოფელ პესკარა დელ ტრონტოშია. მათ შორის არიან ბავშვებიც.

დედაქალაქში რყევა 20 წამის განმავლობაში გრძელდებოდა. დანგრეულია ქალაქი ამატრიჩე, რომლის მერმაც განაცხადა, რომ ნანგრევების ქვეშ ადამიანები არიან მოყოლილები.

სეისმოლოგების განცხადებით არაა გამორიცხული მიწისძვრა კიდევ განმეორდეს, რადგან ის საკმაოდ ძლიერი იყო და შესაძლოა ბიძგები გამოიწვიოს.