ერთიანი ნაციონალური მოძრაობის ბოლნისის რაიონული ორგანიზაციის თავმჯდომარემ, სამირა ისმაილოვამ ბოლნისის პოლიციას უფლებამოსილების გადამეტებაში დაადანაშაულა.

გაერთიანებული ოპოზიციის ოფისში გამართულ ბრიფინგზე მან თქვა, რომ გამომძიებლები გვიან ღამით მის სახლთან მივიდნენ და კარის შემტვრევით ემუქრებოდნენ.

სამირა ისმაილოვამ სატელეფონო ჩანაწერიც გაასაჯაროვა, რომელშიც ბოლნისის პოლიციის თანამშრომელი, ზაზა ფაცაცია, ბოდიშს იხდის და აღიარებს, რომ გამომძიებლებმა უფლებამოსილებას გადაამეტეს.

"გამომძიებლები მივიდნენ ჩემთან სახლში, იმუქრებოდნენ კარის ჩამოღებით და ცდილობდნენ, ასეთი სახით ჩაებარებინათ უწყება. გამომძიებელმა ჩემთან სატელეფონო საუბარში აღიარა. ზაზა ფაცაციამ, პრაქტიკულად, ჩემთან სატელეფონო საუბარში აღიარა, რომ ნამდვილად გადაამეტეს თავიანთ უფლებამოსილებას", – განაცხადა სამირა ისმაილოვამ.

დღეს გაერთიანებული ოპოზიციის სხვა მხარდამჭერებმაც ისაუბრეს ფიზიკურ და სიტყვიერ შეურაცხყოფაზე. თაკო ჩარკვიანს მის თანმხლებ პირთან ერთად თავს დაესხნენ ქუთაისის აეროპორტში. ასევე სიტყვიერი შეურაცხყოფა მიაყენებს პოლიტიკოს, ბაჩუკი ქარდავას.

ძალა ერთობაშიას საარჩევნო შტაბის ხელმძღვანელმა, გიორგი ვაშაძემ განაცხადა, რომ ოპოზიციური პარტიების გაერთიანება მუშაობის საგანგებო რეჟიმზე გადადის და ცხელი ხაზის ამოქმედებას იწყებს. გიორგი ვაშაძემ მოუწოდა მოქალაქეებს დაუკავშირდნენ ამ ცხელ ხაზზე და მიაწოდონ ინფორმაცია ძალადობისა თუ სხვა ტიპის კანონდარღვევების შესახებ.

ხუთშაბათს, 29 ნოემბერს ფილარმონიაში მხარდამჭერებთან შეხვედრის დროს ვაშაძემ განაცხადა, რომ არჩევნების მეორე ტურის შედეგებს არ აღიარებს. 2 დეკემბერს რუსთაველის გამზირზე გაერთიანებული ოპოზიცია საპროტესტო აქციას გამართავს.