ცენტრალურმა საარჩევნო კომისიამ ხმების 98,76% დაითვალა. ამ მონაცემებით, გაერთიანებული ოპოზიციის საპრეზიდენტო კანდიდატი, გრიგოლ ვაშაძე საქართველოს მასშტაბით ორ ოლქში - თელავსა და რუსთავში იმარჯვებს. მიმდინარე მონაცემებით, ვაშაძე საზღვარგარეთის ოლქშიც ლიდერია. ამჟამად საზღვარგარეთ 57 უბნიდან მხოლოდ 15-ია დათვლილი.

ცესკოს მონაცემებით, თელავში ვაშაძემ სალომე ზურაბიშვილს 776 ხმით აჯობა. გაერთიანებული ოპოზიციის კანდიდატმა აქ ხმების 51,19% მიიღო, ხოლო ქართული ოცნების მიერ მხარდაჭერილმა კანდიდატმა - 48,81%. რაც შეეხება რუსთავს, აქ ვაშაძემ 1 660 ხმით მეტი მიიღო, ვიდრე ზურაბიშვილმა. რუსთავში ვაშაძე 51,51%-ით იმარჯვებს, ზურაბიშვილი კი მეორე ადგილზეა 48,49%-ით.