ხელისუფლების მხარდაჭერილი კანდიდატი, სალომე ზურაბიშვილი მედიასთან არაერთი არასასიამოვნო კომუნიკაციის შემდეგ ამბობს, რომ ჟურნალისტებთან ძალიან კარგი თანამშრომლობა ექნება. ამის შესახებ მან რამდენიმე წუთის წინ განაცხადა.

"ძალიან დიდი მადლობა ჟურნალისტებს, ვიცი, რომ ყოველთვის არ გიპასუხეთ ყველა თქვენს კითხვაზე, ზოგჯერ ასე იყო საჭირო, მომავალში გვექნება ძალიან კარგი თანამშრომლობა. დღეს მინდა დიდი მადლობა მოგახსენოთ თქვენც", — აღნიშნა ზურაბიშვილმა.

ზურაბიშვილი წინასაარჩევნო პერიოდში მედიის მიმართ ნეგატიური განწყობებით გამოირჩეოდა. იყო შემთხვევა, როცა ჟურნალისტებს ის "ტვინის განძრევისკენ" მოუწოდებდა. გარდა ამისა, ის ჟურნალისტებს დასმულ კითხვებზე პასუხად ეუბნებოდა, რომ "როცა დაიბარებდა, ეტყოდა".