იტალიაში მომხდარი მიწისძვრის შედეგად გარდაცვლილთა რიცხვი 250-მდე გაიზარდა, 368 დაშავებული ადამიანი კი საავადმყოფოშია გადაყვანილი. ინფორმაციას ამის შესახებ Reuters ავრცელებს.

სამაშველო სამუშაოები ნანგრევებში მთელი ღამის განმავლობაში მიმდინარეობდა. ოფოციალური პირების განმარტებით, მსხვერპლის რაოდენობა კიდევ გაიზრდება.

იტალიის ცენტრალურ ნაწილში 6,2 მაგნიტუდის სიმძლავრის მიწისძვრა 24 აგვისტოს მოხდა. გადარჩენილი ადამიანების ნაწილმა გასული ღამე მანქანებში და კარვებში გაატარა. პირველი ბიძგების შემდეგ 5,1 და 5,4 სიმძლავრის მიწისძვრები კიდევ დაფიქსირდა.

მიწისძვრის ეპიცენტრი რომიდან 100 კილომეტრის დაშორებით დაფიქსირდა. ყველაზე მეტი გარდაცვლილი სოფელ პესკარა დელ ტრონტოშია. მათ შორის არიან ბავშვებიც.

დედაქალაქში რყევა 20 წამის განმავლობაში გრძელდებოდა. დანგრეულია ქალაქი ამატრიჩე, რომლის მერმაც განაცხადა, რომ ნანგრევების ქვეშ ადამიანები არიან მოყოლილები.

სეისმოლოგების განცხადებით არაა გამორიცხული მიწისძვრა კიდევ განმეორდეს, რადგან ის საკმაოდ ძლიერი იყო და შესაძლოა ბიძგები გამოიწვიოს.