ზუგდიდში საუბნო კომისიის წევრი ერთიანი ნაციონალური მოძრაობიდან, ელისო შენგელია, საარჩევნო უბნიდან ფოტოს გადაღების გამო გააძევეს. თავმჯდომარემ, ციალა გურგულიანმა მას შენიშვნა მისცა, მისთვის ტელეფონის წართმევა სცადა და საჩივარი დაწერა.

ნეტგაზეთის მიერ გავრცელებულ ვიდეოში ელისო შენგელია აცხადებს, რომ მას ფოტოს გადაღების უფლება ჰქონდა.

"[კომისიის თავმჯდომარეს] მიზანში ვყავდი, როგორც ნაციონალური მოძრაობის წარმომადგენელი", — აცხადენს შენგელია.

დღეს, 28 ნოემბერს საქართველოში საპრეზიდენტო არჩევნების მეორე ტური იმართება. საქართველოს მასშტაბით დილის რვა საათზე საარჩევნო უბნები გაიხსნა და ხმის მიცემის პროცესი დაიწყო.

მეორე ტურში მონაწილეობას გაერთიანებული ოპოზიციის კანდიდატი გრიგოლ ვაშაძე და მმართველი პარტიის მხარდაჭერილი კანდიდატი სალომე ზურაბიშვილი იღებენ.