საქართველოს ყოფილმა პრეზიდენტმა მიხეილ სააკაშვილმა საპრეზიდენტო არჩევნებამდე 2 დღით ადრე იმ ადამიანების რეაქციას უპასუხა, ვისაც მათი ძალის ხელისუფლებაში დაბრუნების ეშინია.

"[ნულოვანი ტოლერანტობის] სისტემის ქვეშ ძალიან ბევრი ადამიანი მოყვა. მათ შორის, რა თქმა უნდა, იყო გადაჭარბება ძალის, იყო გადამეტება გამოყენებული ზომების", — ამბობს სააკაშვილი და ამატებს, რომ კრიმინალის "ამოძირკვის" მიუხედავად, ადამიანები დაზარალდნენ:

"მე ამ ადამიანების მესმის. მე ძალიან ვწუხვარ, რომ ეს ადამიანები დაზარალდნენ და მე მიმაჩნია, რომ რაღაცები შეიძლებოდა სულ სხვანაირად გაკეთებულიყო".

საპრეზიდენტო არჩევნების მეორე ტურის წინ ყოფილი ხელისუფლების შესაძლო დაბრუნების საკითხი გააქტიურდა. თბილისში არაერთი აქცია გაიმართა ლოზუნგით "არა ნაცებს". თბილისის ქუჩებში გამოჩნდა ბილბორდები წარწერით "არა ნაცებს", "არა ბოროტებას".