გერმანიის პროკურატურამ მასობრივ მკვლელობაში თანამონაწილეობისთვის საკონცენტრაციო ბანაკის 95 წლის დარაჯს ბრალი წაუყენა. ჰანს ჰ. დარაჯი ავსტრიაში მაუტჰაუზენის ბანაკის დარაჯი იყო. BBC-ის ინფორმაციით, ყოფილი დარაჯი მაუტჰაუზენში 1944-1945 წლებში მუშაობდა.

პროკურატურის განცხადებაში აღნიშნულია, რომ ჰანს ჰ. პატიმრების მასობრივ მკვლელობაში იღებდა მონაწილეობას. ის "სიკვდილის ბანაკების" კიდევ ერთი დარაჯია, რომელსაც ბოლო რამდენიმე წლის განმავლობაში ბრალი წაუყენეს.

ავსტრიის ყველაზე დიდ საკონცენტრაციო ბანაკში, მაუტჰაუზენში მყოფი 190 ათასი პატიმრიდან ნახევარი გარდაიცვალა. ჰანს ჰ.ს ბრალად 36 223 მკვლელობის მონაწილეობაში ედება ბრალი.

ბანაკი ქალაქ ლინციდან 20 კილომეტრშია განლაგებული და იქ აგზავნიდნენ ყველას, ვინც ნაცისტური გერმანიის მტრად მიიჩნეოდა. პატიმრები, რომლებსაც მძიმე სამუშაოსთვის იყენებდნენ, არაადამიანური პირობების, სიცივის, შიმშილისა და დაავადებების გამო კვდებოდნენ. ზოგს გაზის კამერებში წამლავდნენ და ხვრეტდნენ.

პროკურატურა ამტკიცებს, რომ ბრალდებულმა იცოდა ყველა იმ პირობის შესახებ, რომლებშიც პატიმრები ცხოვრობდნენ. მათივე თქმით, ჰანს ჰ. უშუალოდ მონაწილეობდა მკვლელობებში ან ხელს უწყობდა მათ. ბერლინის სასამართლომ უნდა გადაწყვიტოს დაიწყება თუ არა ამ საქმეზე პროცესი და მიუსჯიან თუ არა ყოფილ დარაჯს პატიმრობას.