აშშ-ს სახელმწიფო დეპარტამენტის ინფორმაციით, ანკარამ ამერიკაში მცხოვრები სასულიერო პირის, ფეტულა გიულენის ექსტრადირება ოფიციალურად მოითხოვა. ინფორმაციას ამის შესახებ Reuters ავრცელებს.

თუმცა, როგორც უწყების წარმომადგენელმა, მარკ ტონერმა განმარტა, თურქეთს გიულენის გადაცემა სახელმწიფო გადატრიალების მცდელობაში მისი შესაძლო ჩართულობისთვის არ მოუთხოვია:

"ვადასტურებთ, რომ ამ დროისთვის თურქეთმა გიულენის ექსტრადირება ოფიციალურად მოითხოვა".

ტონერმა ასევე აღნიშნა, რომ აღნიშნული მოთხოვნა თურქეთს ქვეყანაში 15 ივლისს მომხდარი ამბოხის გამო არ გაუგზავნია და განმარტა, რომ ეს ქმედება გიულენის მიმართ თურქეთის მხრიდან უფრო ადრე წაყენებულ ბრალდებებს ეხება.

თურქულმა სასამართლომ გიულენის დაპატიმრების შესახებ ბრძანება 2014 წელს მას შემდეგ გასცა, რაც მას ბრალად შეიარაღებული ტერორისტული დაჯგუფების დაარსება და ხელმძღვანელობა დასდო. ადგილობრივი პროკურორი ამტკიცებდა, რომ გამოძიებას ხელთ ჰქონდა ყველა დამამტკიცებელი დოკუმენტი იმისთვის, რომ მისი დანაშაულებრივი ქმედებები დაემტკიცებინა.

ერდოღანი გიულენს თურქეთის სასამართლო და საპოლიციო სისტემაში "პარალელური სტრუქტურის" შექმნაში სდებდა ბრალს. ამასთან, თურქეთის პრეზიდენტი ამბობდა, რომ გიულენს ქვეყანაზე გავლენა თავისი მედია-იმპერიის მეშვეობით ჰქონდა. თურქეთის აღნიშული ქმედებები მაშინ როგორც ევროკავშირმა, ისე აშშ-მაც დაგმო.

თურქეთის ხელისუფლებისა და ერდოღანის ზემოაღნიშნული ქმედებების პარალელურად, 2014 წლის დეკემბერში გიულენთან შესაძლო კავშირის გამო 23 თურქი ჟურნალისტიც დააპატიმრეს, რომლებსაც ბრალად უკანონო ორგანიზაციის შექმნასა და ხელისუფლების ხელში ჩაგდებას სდებდნენ.

თურქეთის ამ გადაწყვეტილებას აკრიტიკებდნენ მსოფლიოს მასშტაბით მოქმედი ადამიანის უფლებებისა და პრესის თავისუფლებაზე მომუშავე ორგანიზაციები.