გამოცემა Reuters წყაროზე დაყრდნობით წერს, რომ ესპანეთი ბრექსტის საკითხს მხარს არ დაუჭერს, მიზეზი კი გიბრალტარის საკითხია. წყარო ამბობს, რომ მადრიდი მოითხოვს, ბრიტანეთსა და ესპანეთს შორის ორმხრივი მოლაპარაკებები გაიმართოს.

ესპანეთის პრემიერ-მინისტრმა, პედრო სანჩესმა ადრე უკვე განაცხადა, რომ შესაძლოა, შეთანხმებას არ დაუჭიროს მხარი. მოგვიანებით, The Telegraph-მა დაწერა, რომ გიბრალტარის მოუგვარებელი საკითხის გამო გერმანიის კანცლერი, ანგელა მერკელი 25 ნოემბერს ბრექსიტის შესახებ სამიტს შესაძლოა, არ დაესწროს.

გიბრალტარი დიდი ბრიტანეთის ზღვისიქითა ტერიტორიაა, რომლის მოსახლეობას ახლო ურთიერთობა აქვს ესპანეთთან. 2016 წელს რეფერენდუმზე უმეტესობამ ევროკავშირიდან გასვლას მხარი არ დაუჭირა. ამასთან დაკავშირებით ნახევარკუნძულის ხელისუფლებამ ევროკავშირში დასარჩენად სხვადასხვა ვარიანტის განხილვა დაიწყო. ამავე დროს, გიბრალტარის მოსახლეობის დიდ ნაწილს დიდი ბრიტანეთის შემადგენლობიდან გამოსვლა არ სურს.

დიდ ბრიტანეთს ბრიუსელში შესთავაზეს, რომ აღნიშნული საკითხი ესპანეთთან განეხილათ, თუმცა ლონდონში ამ შემოთავაზებას სკეპტიკურად მიუდგნენ, რადგან მადრიდს ნახევარკუნძულზე თავისი შეხედულებები აქვს.

დიდი ბრიტანეთი ევროკავშირს 1973 წელს შეუერთდა და პირველი ქვეყანაა, რომელიც მას დატოვებს. 14 ნოემბერს დიდი ბრიტანეთის ხელისუფლებამ ბრექსიტის პროექტს მხარი დაუჭირა. ამ შეთანხმებას მინისტრთა კაბინეტის 11-მა წევრმა არ დაუჭირა მხარი, მათგან ორი კი გადადგა, მათ შორის, ბრექსიტის საკითხების მინისტრი.

დიდი ბრიტანეთის ევროკავშირიდან საბოლოოდ 2019 წლის 29 მარტს უნდა გამოვიდეს. დოკუმენტის პროექტში საუბარია 21-თვიან გარდამავალ პერიოდზე და ე.წ. გაყრის კანონპროექტის დეტალებზე, რომლის მიხედვითაც ბრიტანეთმა ევროკავშირს 39 მილიარდი ფუნტ სტერლინგი უნდა გადაუხადოს.

უთანხმოების ერთ-ერთი მთავარი საკითხი იყო ჩრდილოეთ ირლანდიისა და ირლანდიის რესპუბლიკის საზღვარი. მხარეები ვერ თანხმდებოდნენ ბრექსტისის შემთხვევაში როგორ აეცილებინათ საზღვარზე ფიზიკური შემოწმება.

დიდი ბრიტანეთიც და ევროკავშირიც მიიჩნევენ, რომ ირლანდიის რესპუბლიკასა და ჩრდილოეთ ირლანდიას შორის სრულყოფილი საზღვარი არ უნდა არსებობდეს, რაც პასპორტის კონტროლსა და მკაცრ შემოწმებას გულისხმობს. ბოლო შეთანხმებით კი, საზღვარი ღია იქნება ეს კი "მკაცრი ბრექსიტის" პრინციპებს ღალატობს.

რამდენიმე პარლამენტარის მოწოდების მიუხედავად ტერეზა მეი აცხადებდა, რომ ბრექსიტის საკითხზე მეორე რეფერენდუმი არ ჩატარდება.