ბოლივუდის სუპერვარსკვლავმა ამიტაბჰ ბაჩანმა განაცხადა, რომ ინდოელი ფერმერების სესხები დაფარა, რაშიც 40 მილიონი რუპია გადაიხადა, რაც 560 000 დოლარის ტოლფასია.

ამის შესახებ, ინდოელმა მსახიობმა თავის ბლოგზე დაწერა და აღნიშნა, რომ 1 398 ფერმერზე იზრუნა და ამის გამო თავს კარგად გრძნობდა.

ყველა ფერმერი ინდოეთის ჩრდილოეთით მდებარე შტატიდან, უტარ-პრადეშიდან არიან. სწორედ აქ დაიბადა ბაჩანიც.

ინდოელი ფერმერები

ფოტო: Reuters

უკვე ათწლეულებია, რაც ინდოელ ფერმერებს სესხების გადახდა უჭირთ. 1995 წლის შემდეგ, 300 ათასმა ფერმერმა სიცოცხლე თვითმკვლელობით დაასრულა, რაც სესხების გადაუხდელობას უკავშირდება.

ამიტაბჰ ბაჩანი 76 წლისაა და ის ინდოეთის ყველაზე ცნობილი მსახიობია. ის 190-ზე მეტ ფილმში მონაწილეობდა და ბოლო წლებში, ჰოლივუდის ფილმებშიც გამოჩნდა. ბაჩანი ტელევიზიაში "ვის უნდა გახდეს მილიონერის" ინდური ვერსიის წამყვანიცაა.