ქართული ოცნების დამფუძნებლისა და თავმჯდომარის ბიძინა ივანიშვილის განცხადებით, მმართველი გუნდი ისე იყო დარწმუნებული საკუთარ ძალებში, რომ კვლევებიც კი არაპროფესიონალური ჩაატარეს. ამის შესახებ ბიძინა ივანიშვილმა ტელეკომპანია იმედის ეთერში განაცხადა.

მისი თქმით, გუნდი, რომელიც ხელისუფლებს ყველა რგოლს ფლობს, თვითდაჯერებულობა ემატება.

"ზედმეტი თვითდაჯერებულობა იყო ერთ-ერთი მიზეზი, იმის როგორც ვითარდებოდა და ხდებოდა ურთიერთობა საზოგადოებასთან. ამის კარგი გამოხატულება გახლავთ ის, რომ პირველ ტურში რა შედეგსაც ველოდით. გუნდი საკუთარ ძალებში იმ დონეზე იყო დარწმუნებული, რომ კვლევებიც კი პროფესიონალური არ ჩაუტარებია, რეალურად პარტიული რესურსით ატარებდნენ კვლევებს და ასეთი ცდომილება იყო სირცხვილი. ეგზიტპოლის შემდგომ მეც კი გამომიყვანეს ეს იყო სირცხვილი, ძალიან მკაცრი საუბარი მქონდა ამის შემდგომ. არათუ გრძნობადობა, არამედ მოლოდინი ჰქონდათ რეალობასთან აცდენილი", — განაცხადა ბიძინა ივანიშვილმა.

ივანიშვილის თქმით, არჩევნების შედეგებით გუნდმა მიიღო ცივი შხაპი და დაინახა, რომ საზოგადოება რეაგირებს ხელისუფლების ქცევაზე.

სამი ეგზიტპოლი და სამი შედეგი

საქართველოში საპრეზიდენტო არჩევნები დასრულდა და სამი ეგზიტპოლის მიხედვით, სამი სხვადასხვა შედეგი დაიდო.

მმართველი პარტიის ეგზიტპოლით (მეთოდოლოგია), 52,3 %-ით სალომე ზურაბიშვილმა გაიმარჯვა. მათი თქმით, 28,1 % აქვს გრიგოლ ვაშაძეს და 9,2% დავით ბაქრაძეს. ფსიქოპროექტმა 100 უბანზე 5 104 ადამიანი გამოკითხა. ცდომილების ფარგლები 2,6%-ია.

მეორე ტური იმართება რუსთავი 2-ის მიერ ჩატარებული ეგზიტპოლის შედეგებითაც. 16:00 საათის შედეგებით სალომე ზურაბიშვილს და გრიგოლ ვაშაძეს 40-40% აქვთ, დავით ბაქრაძეს კი — 10%. რუსთავი 2-ისთვის კვლევა გასული წლების მსგავსად კომპანია ედისონ რისერჩმა ჩაატარა. შედეგებში ცდომილების ფარგლები +/-3%-ია, გამოკითხვა 115 უბანზე ჩატარდა.

ევროპული საქართველოს ეგზიტპოლით, მეორე ტური იმართება. კერძოდ, 37% აქვს გრიგოლ ვაშაძეს და 34% სალომე ზურაბიშვილს. პარტიის კანდიდატს, დავით ბაქრაძეს 17% აქვს, შალვა ნათელაშვილს კი — 4. კომპანია BCG-მ 105 საარჩევნო უბანზე 6 000 ადამიანი გამოკითხა. მაქსიმალური ცდომილება 3%-ია.

BCG-ის ეგზიტპოლი ჩატარდა მთელი ქვეყნის მასშტაბით გარდა ოკუპირებული ტერიტორიებისა. ჩატარდა 105 საარჩევნო უბანზე. სულ გამოიკითხა დღის ბოლომდე 9 567 მოქალაქე. მაქს. ცდომილება 3%. გამოქვეყნდა ორი მონაცემი 1. საბაზისო რომელიც ითვალისწინებდა პასუხი უარზე და ყველას წინააღმდეგ ხმის მიცემად 2. ანალიტიკური შეწონვა რომლისთვისაც გამოყენებულ იქნა წინასაარჩევნო კვლევების შედეგები და ეგზიტპოლზე დასმული დამატებითი კითხვები (ქვეყნის მიმართულება და ხელისუფლების საქმიანობის შეფასება). ასევე რესპოდენტების დემოგრაფიული და გეოგრაფიული მაჩვენებლები.