მმართველი გუნდის მიერ მხარდაჭერილმა საპრეზიდენტო კანდიდატმა, სალომე ზურაბიშვილმა ჟურნალისტებთან განაცხადა, რომ უცხოეთში მყოფ დიასპორას არჩევნებში მონაწილეობა გაუჭირდება, თუ მეორე ტურის თარიღი სამუშაო დღეს დაინიშნა.

მისივე თქმით, მასზე არაა დამოკიდებული "აწყობს" თუ არა არჩევნების თარიღი, ეს ცესკოსა და კანონზეა დამოკიდებული.

დღეს, 14 ნოემბერს ცესკოს სხდომაზე შედეგების შეჯამებასთან ერთად კენჭისყრის თარიღსაც დანიშნავენ, რაც იმას ნიშნავს, რომ არჩევნების მეორე ტურის კენჭისყრის დღედ, შესაძლოა, ოთხშაბათი, 28 ნოემბერი განისაზღვროს.

არასამთავრობო ორგანიზაციები აცხადებენ, რომ არჩევნების სამუშაო დღეს დანიშვნის გამო საქართველოს ზოგიერთი მოქალაქე არჩევნებში მონაწილეობას ვერ მიიღეს:

  • საარჩევნო კოდექსის მე-6 მუხლის თანახმად, არჩევნების დღე უქმე დღედ ცხადდება, თუმცა არჩევნების სამუშაო დღეს გამართვა სერიოზულ პრობლემას უქმნის საზღვარგარეთ მყოფ საქართველოს მოქალაქეებს. მათთვის განსაკუთრებულად რთულდება საარჩევნო უფლების რეალიზება იმ ვითარებაში, როდესაც არჩევნები სამუშაო დღეს ტარდება, რადგან საქართველოს საპრეზიდენტო არჩევნების მეორე ტური საზღვარგარეთ უქმე დღე არ იქნება;
  • სამუშაო კვირის შუა პერიოდში არჩევნების გამართვა საქართველოში მცხოვრები მოქალაქეებისთვისაც გარკვეულ დაბრკოლებას წარმოადგენს, რადგან ხშირ შემთხვევაში ამომრჩეველს საკუთარი რეგისტრაციის ადგილზე სჭირდება მისვლა, რაც ხშირად ერთი ქალაქიდან მეორეში გადაადგილებას გულისხმობს, რისთვისაც ერთი სამუშაო დღის უქმედ გამოცხადება საკმარისი არ არის.

თბილისის მერს, კახა კალაძეს მიაჩნია, რომ არჩევნების მეორე ტურის სამუშაო დღეს დანიშვნა უცხოეთში მცხოვრებ ქართველებს ხელს არ შეუშლის. კალაძემ პარალელი 2012 წელთან გაავლო, როცა საპრეზიდენტო არჩევნები ორშაბათ დღეს ჩატარდა.

მსგავს პოზიციაზეა პარლამენტის თავმჯდომარე, ირაკლი კობახიძეც. მას არ ჰგონია, რომ არჩევნების თარიღმა ამომრჩეველთა აქტივობაზე გავლენა ჰქონდეს.