საქართველოს ფინანსთა მინისტრის, ივანე მაჭავარიანის განცხადებით, ინფრასტრუქტურული პროექტების შესრულების დაგვიანების შესახებ დასმული კითხვები ლეგიტიმურია, ხოლო კორუფციის შესახებ კითხვები სპეკულაციური. ამის შესახებ ფინანსთა მინისტრმა, საქართველოს პარლამენტის პლენარულ სხდომაზე ინფრასტრუქტურული პროექტების მიმდინარეობს შესახებ დასმული კითხვების საპასუხოდ განაცხადა.

მისი თქმით, ყველა ინფრასტრუქტურული პროექტი დონორების მიერ ფინანსდება, რასაც კორუფციის რისკი ნულამდე დაჰყავს.

"ეს პროექტები დაგვიანებულია იმიტომ, რომ ჩვენ ზედმეტად ვართ შეშინებული ზუსტად ამ კორუფციული ბრალდებების გამო და ზედმეტად "ვუჭერთ", ამიტომ უფრო მეტი დრო მიაქვს ამ პროცესს, უფრო მეტად ფრთხილები ვართ და დაგვიანების მიზეზი ესაა", — განაცხადა ივანე მაჭავარიანმა.

მისი თქმით, განცხადებები იმაზე, რომ ინფრასტრუქტურულ პროექტებზე გამოყოფილი ფული სხვაგან უნდა დავხარჯოთ არასწორია, რადგან ეს არის მიზნობრივი სახელობითი ფული, რომელიც კონკრეტული პროექტის განხორციელებისკენაა მიმართული.

მინისტრის თქმით, დონორების წესები საკმაოდ ბიუროკრატიულია, რაც დროში აფერხებს კონკრეტული პროექტების დასრულებას.

საქართველოს პარლამენტის პლენარულ სხდომაზე 2019 წლის სახელმწიფო ბიუჯეტის პროექტს განიხილავენ. ქვეყნის მთავარი ფინანსური დოკუმენტის განხილვა 12:00-ზე უნდა დაწყებულიყო, თუმცა კვორუმის არარსებობის გამო 4 საათით დაიგვიანა.