პრემიერ-მინისტრმა, მამუკა ბახტაძემ საპრეზიდენტო არჩევნების მეორე ტურის წინ მთავრობის კიდევ ერთ ინიციატივაზე ისაუბრა. მისი თქმით, 2019 წლის პირველი იანვრიდან მნიშვნელოვნად გამოხატული შეზღუდული შესაძლებლობის მქონე 75 ათასზე მეტი პირი (მეორე ჯგუფი) გაზრდილ სოციალურ პაკეტს მიიღებს. კერძოდ, პირველი იანვრიდან მეორე ჯგუფის შშმ პირების სოციალური დახმარება 100-ის ნაცვლად 120 ლარი იქნება.

ბახტაძემ ამის შესახებ აღნიშნული ჯგუფის წარმომადგენლებთან დღევანდელ, 12 ნოემბრის შეხვედრაზე ისაუბრა. მისივე თქმით, ჯანდაცვის და ფინანსთა სამინისტროებმა სოციალური დახმარების გასაზრდელად რესურსი მომავალი წლის ბიუჯეტში უნდა მოიძიონ.

მთავრობის გადაწყვეტილებები მეორე ტურის წინ

28 ოქტომბრის შედეგების შემდეგ მმართველმა გუნდმა "შეცდომების გამოსწორებაზე" დაიწყო საუბარი. მეორე ტურისთვის მოსამზადებლად საპარლამენტო უმრავლესობის წევრები ცენტრალურ ოფისში პარტიის თავმჯდომარეს, ბიძინა ივანიშვილსაც შეხვდნენ.

ქართული ოცნების მიერ მხარდაჭერილი კანდიდატისთვის, სალომე ზურაბიშვილისთვის მიცემული ხმების ნაკლებობა დეპუტატებმა სხვადასხვანაირად ახსნეს. მაგალითად, დეპუტატი კარლო კოპალიანი მიიჩნევს, რომ თუ "ხალხს მოეფერებიან" და მათი პრობლემებით დაინტერესდებიან, მეორე ტურში აუცილებლად გაიმარჯვებენ.

გია ჟორჟოლიანს მიაჩნია, რომ 28 ოქტომბერს საპრეზიდენტო არჩევნებზე მოსახლეობის უმეტესობამ უკმაყოფილება გამოხატა მმართველი გუნდის პოლიტიკის, კერძოდ, ეკონომიკური პოლიტიკის და არა სალომე ზურაბიშვილის მიმართ.

კიდევ ერთ მიზეზად კანაფის კულტივაციის კანონპროექტი დასახელდა. რამდენიმე დღის წინ ჯანდაცვის კომიტეტის თავმჯდომარე აკაკი ზოიძე და კიდევ რამდენიმე დეპუტატი ითხოვდნენ, რომ კანონპროექტი უკან გაწვეულიყო. ამის შემდეგ კი შინაგან საქმეთა მინისტრი, გიორგი გახარია და პარლამენტის თავმჯდომარე, ირაკლი კობახიძე პატრიარქს შეხვდნენ და კანონი უკან გაიწვიეს.

კიდე ერთი ინიციატივა, რომელიც მეორე ტურის წინ მმართველმა გუნდა დააანონსა საკონსტიტუციო სასამართლოს გადაწყვეტილებების შეზღუდვაა. კობახიძის თქმით, იმსჯელებენ ცვლილებებზე, რომელიც ნარკოპოლიტიკის საკითხებში საკონსტიტუციო სასამართლოს გადაწყვეტილებებს შეზღუდავს.

ამასთან, საპრეზიდენტო არჩევნების მეორე ტურის წინ საქართველოს პრემიერ-მინისტრმა, მამუკა ბახტაძემ განაცხადა, რომ სოციალურად დაუცველი 16 წლამდე ბავშვების დახმარება 10 ლარიდან 50 ლარამდე გაიზრდება.

2 ნოემბრის მთავრობის სხდომის დასრულების შემდეგ, ჯანდაცვის მინისტრმა, დავით სერგეენკომ თქვა, რომ სოციალურად დაუცველ მოსახლეობას სამსახურის დაწყების გამო დახმარება აღარ შეუწყდება. მისივე თქმით, სოციალურად დაუცველი ოჯახების ბავშვებისთვის 50-ლარიანი დახმარებისთვის ბიუჯეტიდან 70 მილიონი ლარი გამოიყოფა.

მამუკა ბახტაძემ 8 ნოემბერს განაცხადა, რომ 2019-20 წლებში შეიარაღებული ძალების მოსამსახურეებს ხელფასი წოდების მიხედვით გაეზრდებათ. 2019 წლიდან ხელფასი მოემატება შსს-ს დაახლოებით 2 900 თანამშრომელსაც.

პრემიერის განცხადებითვე, თავდაცვის სამინისტროს მოსამსახურეებს ბინები სამ ეტაპად 2020 წლისთვის გადაეცემათ. მთავრობა ბინების გადაცემას იძულებით გადაადგილებული პირებისთვისაც გეგმავს. ბახტაძის თქმით, 2019 წლის ბიუჯეტის თანახმად, 2 000-მდე მოქალაქე მიიღებს ბინას. ბიუჯეტიდან თანხები გამოიყოფა საზღვრისპირა სოფლებში გათბობის უზრუნველყოფისა და სტუდენტების სწავლის დაფინანსების მიზნითაც.

აღნიშნულ ინიციატივებს არასამთავრობო ორგანიზაციები გამოეხმაურნენ. საერთაშორისო გამჭვირვალობა — საქართველომ განაცხადა, რომ მეორე ტურის წინ ხელისუფლებამ მასშტაბური სოციალური პროექტების წარდგენისგან თავი უნდა შეიკავოს, რადგან ამით სახელისუფლო კანდიდატი სერიოზულ უპირატესობას იღებს.

ორგანიზაცია სამართლიანი არჩევნები კი მიიჩნევს, რომ ხელისუფლების მიერ საპრეზიდენტო არჩევნების მეორე ტურის წინ დაანონსებული სოციალური და ინფრასტრუქტურული პროექტები ადმინისტრაციული რესურსის გამოყენებაა. ორგანიზაციის განცხადებით, ახალ პროგრამებზე მეორე ტურის წინ საუბარი ქმნის შთაბეჭდილებას, რომ ინიციატივების მიზანია, მთავრობის მიერ მხარდაჭერილ კანდიდატს, სალომე ზურაბიშვილს უფრო მეტმა ამომრჩეველმა მისცეს ხმა.