პრემიერ-მინისტრმა, მამუკა ბახტაძემ საპრეზიდენტო არჩევნების მეორე ტურის წინ მთავრობის ინიციატივებზე ისაუბრა.

დღეს, 8 ნოემბერს გამართულ ბრიფინგზე მან განაცხადა, რომ 2019-2020 წლებში შეიარაღებული ძალების მოსამსახურეებს ხელფასი წოდების მიხედვით გაეზრდებათ. ამასთან, მისი თქმით, 2019 წლიდან შსს-ს დაახლოებით 2 900 თანამშრომელს, მათ შორის, სასაზღვრო პოლიციის მესაზღვრეებსა და სანაპირო დაცვის ხომალდების მომსახურე პერსონალს, ხელფასი 250 ლარით გაეზრდება. ხელფასის მომატება დაგეგმილია სახელმწიფო დაცვის სპეციალური სამსახურის თანამშრომლებისთვისაც.

პრემიერ-მინისტრის განცხადებით, თავდაცვის სამინისტროს მოსამსახურეებს ბინები სამ ეტაპად 2020 წლისთვის გადაეცემათ, რითაც 2007 წელს ნაკისრი ვალდებულებები შესრულდება.

მთავრობა ბინების გადაცემას იძულებით გადაადგილებული პირებისთვისაც გეგმავს. ბახტაძის თქმით, 2019 წლის ბიუჯეტის თანახმად, 2 000-მდე მოქალაქე მიიღებს ბინას. ბიუჯეტიდან თანხები გამოიყოფა საზღვრისპირა სოფლებში გათბობის უზრუნველყოფისა და სტუდენტების სწავლის დაფინანსების მიზნითაც. ბახტაძის განცხადებით, დამატებით 20 მილიონი ლარის მობილიზება მოხდება, რომელიც დევნილების საცხოვრებელი პირობების გასაუმჯობესებლად დაიხარჯება, ამასთან, გაგრძელდება დევნილებისთვის საცხოვრებელი ფართობის დაკანონების პროცესიც.

გადაწყვეტილებები მეორე ტურის წინ

28 ოქტომბრის შედეგების შემდეგ მმართველმა გუნდმა "შეცდომების გამოსწორებაზე" დაიწყო საუბარი. მეორე ტურისთვის მოსამზადებლად საპარლამენტო უმრავლესობის წევრები ცენტრალურ ოფისში პარტიის თავმჯდომარეს, ბიძინა ივანიშვილსაც შეხვდნენ.

ქართული ოცნების მიერ მხარდაჭერილი კანდიდატისთვის, სალომე ზურაბიშვილისთვის მიცემული ხმების ნაკლებობა დეპუტატებმა სხვადასხვანაირად ახსნეს. მაგალითად, დეპუტატი კარლო კოპალიანი მიიჩნევს, რომ თუ "ხალხს მოეფერებიან" და მათი პრობლემებით დაინტერესდებიან, მეორე ტურში აუცილებლად გაიმარჯვებენ.

გია ჟორჟოლიანს მიაჩნია, რომ 28 ოქტომბერს საპრეზიდენტო არჩევნებზე მოსახლეობის უმეტესობამ უკმაყოფილება გამოხატა მმართველი გუნდის პოლიტიკის, კერძოდ, ეკონომიკური პოლიტიკის და არა სალომე ზურაბიშვილის მიმართ.

კიდევ ერთ მიზეზად კანაფის კულტივაციის კანონპროექტი დასახელდა. რამდენიმე დღის წინ ჯანდაცვის კომიტეტის თავმჯდომარე აკაკი ზოიძე და კიდევ რამდენიმე დეპუტატი ითხოვდნენ, რომ კანონპროექტი უკან გაწვეულიყო. ამის შემდეგ კი შინაგან საქმეთა მინისტრი, გიორგი გახარია და პარლამენტის თავმჯდომარე, ირაკლი კობახიძე პატრიარქს შეხვდნენ და კანონი უკან გაიწვიეს.

კიდე ერთი ინიციატივა, რომელიც მეორე ტურის წინ მმართველმა გუნდა დაანონსა საკონსტიტუციო სასამართლოს გადაწყვეტილებების შეზღუდვაა. კობახიძის თქმით, იმსჯელებენ ცვლილებებზე, რომელიც ნარკოპოლიტიკის საკითხებში საკონსტიტუციო სასამართლოს გადაწყვეტილებებს შეზღუდავს.

ამასთან, საპრეზიდენტო არჩევნების მეორე ტურის წინ საქართველოს პრემიერ-მინისტრმა, მამუკა ბახტაძემ განაცხადა, რომ სოციალურად დაუცველი 16 წლამდე ბავშვების დახმარება 10 ლარიდან 50 ლარამდე გაიზრდება.

2 ნოემბრის მთავრობის სხდომის დასრულების შემდეგ, ჯანდაცვის მინისტრმა, დავით სერგეენკომ თქვა, რომ სოციალურად დაუცველ მოსახლეობას სამსახურის დაწყების გამო დახმარება აღარ შეუწყდება. მისივე თქმით, სოციალურად დაუცველი ოჯახების ბავშვებისთვის 50-ლარიანი დახმარებისთვის ბიუჯეტიდან 70 მილიონი ლარი გამოიყოფა.