ხორავას ქუჩაზე მოკლულის, დავით სარალიძის მამა ზაზა სარალიძე პოლიციას სთავაზობს დესტაბილიზაციის საფრთხის პრევენციის მიზნით, რუსთაველის გამზირზე გაშლილი კარვები ყოველ 2 საათში შეამოწმონ.

ამ განცხადებით, ზაზა სარალიძე შინაგან საქმეთა მინისტრს გიორგი გახარიას გამოეხმაურა, რომელმაც თქვა, რომ გუშინ, 10 ნოემბერს იყო საფრთხე ესკალაციისა და დესტაბილიზაციის. ასევე კარვების სისტემატური შემოწმების ინიციატივა უკავშირდება საპატრულო პოლიციის ხელმძღვანელის 10 ნოემბრის განცხადებას, რომლის მიხედვითაც, იყო ეჭვი, რომ კარვით რუსთაველის გამზირზე საეჭვო ნივთიერებას შეიტანდნენ. სწორედ ეს გახდა მიზეზი, კარვები დადგმის აკრძალვის რუსთაველი გამზირზე, რასაც აქციის მონაწილეებსა და პოლიციას შორის დაპირისპირება მოჰყვა.

საპატრულო პოლიციის წარმომადგენლების განცხადებით, ამ ეტაპზე კარვების შემოწმება საჭირო არ არის.

თბილისის მერიამ 5 ნოემბერს შვილმკვდარ მამას, ზაზა სარალიძეს, რომელიც შვილის მკვლელების დასჯას ითხოვს, წერილი მისწერა. წერილში მერია ითხოვს, რომ სარალიძემ აქცია თბილისში, პარლამენტის შენობის მიმდებარე ტერიტორიის ნაცვლად სხვა ადგილზე გამართოს.

ამ საკითხთან დაკავშირებით დასმული კითხვის საპასუხოდ თბილისის მერმა, კახა კალაძემ განაცხადა, რომ დედაქალაქი საახალწლოდ ემზადება და ამ ადგილის გამოყენება შეუძლებელი იქნება. როგორც მერი განმარტავდა, აქციის მონაწილეებს შეუძლიათ სხვა ადგილი იპოვონ.

ზაზა სარალიძისთვის კონსტიტუციური უფლების, კარვის გაშლის უფლების შეზღუდვის გამო 10 ნოემბერს აქცია გამართეს არასამთავრობო ორგანიზაციებმა. პოლიციის წინააღმდეგობის მიუხედავად, თბილისში, რუსთაველის გამზირზე, პარლამენტის შენობის წინ არასამთავრობოებმა პროტესტის ნიშნად კარვები მაინც გაშალეს. ასევე შეიქმნა პეტიცია "უარს ვამბობ ნაძვის ხეზე, ვირჩევ ადამიანს!".

თბილისის მერმა კახა კალაძემ ბრიფინგი გამართა, სადაც განაცხადა, რომ დეზინფორმაციაა, თითქოს სარალიძეს კარვის აღება საახალწლო ნაძვის ხის გამო მოსთხოვეს. მისი თქმით, ეს იყო რეკომენდაცია, რომლის გათვალისწინებაც აქციის მონაწილეების პრეროგატივაა. ზაზა სარალიძისა და მალხაზ მაჩალიკაშვილის თქმით, ეს არ იყო რეკომენდაცია და მათ მოითხოვეს კარვების აღება პარლამენტის მიმდებარე ტერიტორიიდან. ზაზა სარალიძის თქმით, კახა კალაძე თავის მართლების პოზიციაშია და თავისი ნათქვამის გამოსწორებას ცდილობს. ამ დროისთვის პარლამენტთან 16 კარავია განთავსებული და მასში აქციის მონაწილეები იმყოფებიან.