ცენტრალური საარჩევნო კომისიის თავჯდომარე, თამარ ჟვანია, არასამთავრობო ორგანიზაციებისა და ოპოზიციური პარტიების წარმომადგენლების მიერ გავრცელებულ ინფორმაციას იმასთან დაკავშირებით, რომ საუბნო საარჩევნო კომისიების დაკომპლექტება დარღვევებით მიმდინარეობს, უარყოფს და განმარტავს, რომ პროცესი გამჭვირვალე და საჯაროა:

"ამ ეტაპზე არ არის დადასტურებული საფუძვლები და გარემოებები, რომ რაიმე კითხვის ნიშნები იმიტომ, რომ ტარდება საუბნო საარჩევნო კომისიების დაკომპლექტების საკითხთან დაკავშირებით სხდომები, რომელიც არის გამჭვირვალე და საჯარო".

არასამთავრობო ორგანიზაცია სამართლიანმა არჩევნებმა გაავრცელა ინფორმაცია, რომ რამდენიმე ოლქში საუბნო საარჩევნო კომისიის წევრთა შესარჩევი კონკურსი ხარვეზებით მიმდინარეობს. კერძოდ, ორგანიზაციის დამკვირვებლებმა სხვადასხვა წყაროებიდან შეიტყვეს ზოგიერთ საარჩევნო ოლქში საუბნო კომისიის შესარჩევი წევრების სავარაუდო წინასწარი სიების არსებობის შესახებ, რომლითაც საოლქო კომისიის წევრებს უნდა ეხელმძღვანელათ.

ამავე ინფორმაციას ავრცელებენ ოპოზიციური პარტიების წარმომადგენლები, ენმ კი ამბობს, რომ აღნიშნული ფაქტის დასამტკიცებლად დოკუმენტური ინფორმაცია გააჩნია.