ერთიანი ნაციონალური მოძრაობა თბილისის საკრებულოს წევრ თედო კობახიძის წინააღმდეგ წაყენებულ ბრალდებებზე გამოძიების დაწყებას ითხოვს.

დღეს გამართულ ბრიფინგზე ენმ-ის წევრმა ოთარ კახიძემ მანანა კობახიძე ნეპოტიზმში დაადანაშაულა და განაცხადა, რომ მის ძმას, თედო კობახიძეს საადვოკატო საქმიანობის უფლება არ აქვს, თუმცა ამ საქმიანობას "მანანა კობახიძის გავლენის გამოყენებით" მაინც ეწევა:

"ქართულმა ოცნებამ დაამკვიდრა აქამდე გაუგონარი პრაქტიკა - ახლობლების, ნათესავების და მეგობრების დასაქმება სამსახურებში და შემდგომ მათი ხელფასების წილებში ჩაჯდომა.

ქართული ოცნების ერთ-ერთი ლიდერის ძმა იყენებს საკუთარ ზეგავლენას იმისთვის, რომ სხვადასხვა პირებს გაუფორმდეთ საპროცესო შეთანხმება და ამაში იღებს თანხას".

ენმ-ის ტყიბულისა და თერჯოლის გაერთიანებულ ოლქში მაჟორიტარი დეპუტატობის კანდიდატი ოთარ კახიძე აცხადებს, რომ თუ ამ სქემაში პროკურატურაცაა ჩართული და ის პოლიტიკურ ზეგავლენას ექვემდებარება, ობიექტური გამოძიების იმედი ვერ ექნება:

"47 დღე დარჩა იქამდე, როცა საქართველოს მოქალაქეები წერტილს დაუსვამენ ხელფასების წილებში ჩაჯდომას და ჩვენ ერთად წავიყვანთ საქართველოს წინ. თუკი შოთაძე და კობახიძე ერთად აგვარებენ ამ საქმეებს, რისი იმედი უნდა გვქონდეს არ ვიცი. მანანა კობახიძის ძმა რომ ამას აკეთებს, წარმოიდგინეთ, რას აკეთებენ მინისტრები და ის ადამიანები, ვისაც მანანა კობახიძეზე მეტი პოლიტიკური წონა აქვს".