საპრეზიდენტო კანდიდატის, სალომე ზურაბიშვილის შვილის, თეიმურაზ გორჯესტანის და საქართველოს მესამე პრეზიდენტის, მიხეილ სააკაშვილის ჩართვა საარჩევნო კამპანიაში, რომლებიც საქართველოს მოქალაქეები არ არიან, შესაძლოა, უკანონო იყოს. ამის შესახებ ინფორმაციას საქართველოს ახალგაზრდა იურისტთა ასოციაცია ავრცელებს.

თეიმურაზ გორჯესტანის მონაწილეობა საარჩევნო კამპანიაში

თეიმურაზ გურჯისტანი სპორტის სასახლეში სალომე ზურაბიშვილის საარჩევნო კამპანიის შეჯამებისას, 25 ოქტომბერს სიტყვით გამოვიდა. მან განაცხადა, რომ " სალომე ზურაბიშვილი მოიგებს, ამ მოგებით კი მთელი საქართველო გაიმარჯვებს". მისივე განცხადებით, არჩევნებზე საზოგადოება მივა იმისთვის, რომ ევროპული მომავალი აირჩიოს.

"მომავალი მარტო ერთია: საქართველოს გამარჯვება! სხვა მომავალი არ არის! ეს არის მნიშვნელოვანი არჩევნები ამ ქვეყნის მომავლისთვის და თავისუფლებისთვის.არჩევნებზე საზოგადოება გამოვა იმისთვის, რომ სიმართლე და ევროპული მომავლის საქართველო აირჩიონ და რუსეთის კანდიდატს გამარჯვების საშუალება არ მისცენ", — განაცხადა ზურაბიშვილის შვილმა.

მიხეილ სააკაშვილის მონაწილეობა საარჩევნო კამპანიაში

საიას განცხადებაში წერია, რომ მიხეილ სააკაშვილი 2018 წლის საპრეზიდენტო არჩევნების გარდა, 2016-2017 წლებში აქტიურად მონაწილეობდა წინასაარჩევნო კამპანიაში და მათი არაერთი განცხადებისა, საარჩევნო ადმინისტრაციამ მისი მონაწილეობა აგიტაციაში სამართალდარღვევად არ ჩათვალა.

განცხადებაში სააკაშვილის ვიდეო მიმართვაზეც წერია, სადაც ის სიძულვილის ენას იყენებს და ამბობს, რომ საქართველოს მდიდარი ტურისტები სჭირდება და არა "გაძვალტყავებული და ჯღანები.

როგორც საიაში აცხადებენ, ეთნიკური და რელიგიური ჯგუფის ნეგატიური ლექსიკით მოხსენიება ქსენოფობიური ხასიათის სიძულვილის ენაა.

"ამგვარი განცხადება ხელს უწყობს დაუცველი ჯგუფის მიმართ საზოგადოებაში ნეგატიური სტერეოტიპების დამკვიდრებას და, საბოლოო ჯამში, ახდენს სიძულვილის კულტივირებას. ბანგლადეშელებისა და ინდუსების ,"ჯღანად" მოხსენიებით მესამე პრეზიდენტის განცხადება გასცდა ტურიზმის პოლიტიკასთან დაკავშირებით ლეგიტიმური დისკუსიის ფარგლებს და აშკარად ქსენოფობიური ხასიათი შეიძინა. სამწუხაროდ, ეს არ არის პირველი შემთხვევა, როდესაც საარჩევნო სუბიექტების მხარდამჭერები იყენებენ სიძულვილის ენას და ძალადობის, ეროვნული შუღლისა და მტრობის, რელიგიური და ეთნიკური დაპირისპირების მქონე განცხადებების ტირაჟირებას ახორციელებენ", — წერია განცხადებაში.

საია მოუწოდებს საარჩევნო სუბიექტებს, მათ მხარდამჭერებსა და საარჩევნო ადმინისტრაციას:

  • კანონმდებლობასთან შესაბამისობაში წარმართონ საარჩევნო კამპანია და საკუთარ გამოსვლებში აღკვეთონ სიძულვილის ენის შემცველი ან ძალადობრივი, ეროვნული შუღლისა და მტრობისკენ, რელიგიური და ეთნიკური დაპირისპირების შემცველი განცხადებები;
  • შეისწავლოს უკანონო აგიტაციის ფაქტები და მიიღოს შესაბამისი გადაწყვეტილებები.