ზღვაში დაკარგული ერთ-ერთი სამხედროს იაგო შარაძის მამამ ვლადიმერ შარაძემ რუსთავი 2-ს განუცხადა, რომ წვრთნების გავლის დროს მის შვილს ყურის ანთება ჰქონდა. ოჯახის წევრები სვამენ კითხვას, თუ რატომ მისცეს ასეთ მდგომარეობაში იაგო შარაძეს ზღვაში ჩაყვინთვის უფლება.

საქართველოს წყალქვეშა ცურვის ასოციაციის თავმჯდომარე დავით ნიკოლეიშვილი აცხადებს, რომ წყალში ჩაყვინთვა გაციების შემთხვევაშიც კი არ შეიძლება, არა ყურის ანთების დროს:

"თუ მისი ავადმყოფობის შესახებ ხელმძღვანელობამ იცოდა, შედეგი ინსტრუქტორის ბრალი არაა და პასუხისმგებლობა სწორედ ხელმძღვანელობას ეკისრება".

ნიკოლეიშვილი შემთხვევის ერთ-ერთ მიზეზად აღჭურვილობის გაუმართაობასაც ასახელებს.

ადგილზე იმყოფებოდა თავდაცვის მინისტრი ლევან იზორიაც, რომელიც აცხადებს, რომ ყველა ვერსია დასაშვებია:

"მტკიცება იმისა, რომ გადაცდომას ჰქონდა ადგილი, ამის თქმის უფლებაც არ მაქვს. ყველაფერი არის დასაშვები, ყველა ვერსიაზე არის სამუშაო".

დაკარგული სამხედროების ძებნა ამ დრომდე გრძელდება. ძებნაში ჩართულია ამერიკისა და თურქეთის სამაშველო ეკიპაჟიც.