ქართული ოცნების ცენტრალურ ოფისში თბილისის შტაბის ხელმძღვანელი, კახი კალაძე რეგიონების შტაბების ხელმძღვანელებსა და მერებს ხვდება. შეხვედრა, სავარაუდოდ, წინასაარჩევნო გარემოს უკავშირდება.

რუსთავი 2-ის ცნობით, შეხვედრას თბილისის შტაბის ხელმძღვანელთან ერთად, რეგიონების შტაბის ხელმძღვანელი ირაკლი კობახიძე და პარტიის თავმჯდომარე ბიძინა ივანიშვილი ესწრებიან.

მოქმედ მერებთან და რეგიონის სხვა წარმომადგენლებთან ერთად, ქართული ოცნების ოფისში მივიდა კასპის რაიონის ყოფილი გამგებელი ოლეგ იაძე.

ჟურნალისტების კითხვაზე, რა სტატუსით იმყოფება მმართველი გუნდის ყოფილი წევრი ქართული ოცნების შეხვედრაზე, იაძე ამბობს, რომ ის სპორტის მიმართულებით მუშაობს.

ქართული ოცნების "ამომრჩეველთან შერიგება"

არჩევნების შედეგების გამოცხადების შემდეგ პრემიერ მინისტრმა მამუკა ბახტაძემ განაცხადა, რომ ხელისუფლებამ ქართული საზოგადოებისგან მიიღო მკაფიო გზავნილი მათ დაშვებულ შეცდომებზე. ამიტომ, მეორე ტურის წინ მმართველმა პარტიამ "ამომრჩეველთან შერიგება" გადაწყვიტა.

პარტიის ოფისში ივანიშვილთან ერთად შეკრებილებმა ამისთვის სხვადასხვა გზები განიხილეს. მაგალითად, დეპუტატმა კარლო კოპალიანმა განაცხადა, რომ თუ "ხალხს მოეფერებიან" და მათი პრობლემებით დაინტერესდებიან, მეორე ტურში აუცილებლად გაიმარჯვებენ.

პრემიერმა კი მთავრობის სხდომაზე განაცხადა, რომ სოციალურად დაუცველ ბავშვებს დახმარებას 10 ლარიდან 50 ლარამდე გაუზრდიან.

ხელისუფლებამ გაითვალისწინა საქართველოს საპატრიარქოს ინტერესებიც და პატრიარქთან შეთანხმებით, მეორე ტურის წინ მარიხუანის კულტივაციის კანონპროექტი გაიწვია. კიდე ერთი ინიციატივა, რომელიც მეორე ტურის წინ მმართველმა გუნდა დააანონსა საკონსტიტუციო სასამართლოს გადაწყვეტილებების შეზღუდვაა.