ყოფილი პროკურორის, ოთარ ფარცხალაძის ადვოკატი გაგი მოსიაშვილი ამბობს, რომ მის დაცვის ქვეშ მყოფს ბრალი ყოფილი მთავარი აუდიტორის ლაშა თორდიას ცემის საქმეზე წაუყენეს. ამის შესახებ ადვოკატი ტელეკომპანია რუსთავი 2-ს ესაუბრა.

"ჩვენ მივიღეთ ისეთი მოცემულობა, რომ საგამოძიებო ორგანომ საპროცესო კანონმდებლობა კი არ დაუდო ბრალის წარდგენა, არამედ ოპოზიციურად განწყობილი საზოგადოების პოზიცია", — განაცხადა ადვოკატმა.

მისივე თქმით, ფარცხალაძე დაკავებული არაა და სასამართლომ გუშინ, 5 ნოემბერს გირაოს სახით 5 000-ლარიანი გირაო შეუფარდა. ადვოკატი ამბობს, რომ სამართლებრივ ბრძოლას აპირებენ.

რუსთავი 2-თან საუბრისას თორდია ფარცხალაძისთვის ბრალის წაყენებას არჩევნებს უკავშირებს. ყოფილი აუდიტორი კიდევ ერთხელ იმეორებს, რომ ყოფილი პროკურორი თავს მისი სამსახურეობრივი საქმიანობიდან გამომდინარე დაესხა.

ლაშა თორდიას ცემის საქმე

2017 წლის 12 მაისს სახელმწიფო აუდიტის სამსახურის ხელმძღვანელს, ლაშა თორდიას თავს დაესხნენ. თორდია თავდასხმაში ყოფილ პროკურორ ფარცხალაძეს ადანაშაულებდა.

თორდიას მიაჩნდა, რომ თავდასხმა მისი სამსახურის მიერ ყოფილი პროკურორის შესახებ მასალების მოგროვებას უკავშირებოდა. გენერალური აუდიტი ამბობდა, რომ ფარცხალაძეს დაუსჯელობის განცდა აქვს.

ბრალდებების პასუხად, ფარცხალაძემ განაცხადა, რომ გენერალური აუდიტი იტყუებოდა და კონფლიქტის ინიციატორი თავადვე იყო. მისი თქმით, თორდია მთვრალ მდგომარეობაში იმყოფებოდა და ხელი პირველად მან მოიქნია.

"როგორც ჩანს, მას გულში აქვს ჩარჩენილი ჩემი გარკვეული ქმედებები სამართალდამცავ უწყებებში ჩემს საქმიანობასთან დაკავშირებით, რაზეც შესაბამის ინფორმაციას მივაწვდი გამოძიებას", — ამბობდა ფარცხალაძე. თუმცა, მომხდარიდან 4 დღის განმავლობაში ის დაკითხვაზე არ დაიბარეს. უწყებაში ამბობდნენ, რომ გამოძიების პრეროგატივა იყოს ის, თუ როდის დაკითხავდენ ყოფილ პროკურორს.

2017 წლის 16 მაისს ფარცხალაძის დაკითხვისკენ პროკურატურას პარლამენტის თავმჯდომარემ მოუწოდა. 17 მაისს ყოფილი პროკურორი დაკითხეს.

ფარცხალაძის გამოკითხვიდან ერთ კვირაში, 24 მაისს სოციალურ ქსელში ლაშა თორდიას სხვა ინციდენტის ამსახველი კადრები გავრცელდა. თორდია და არასამთავრობოები აცხადებდნენ, რომ კადრების გავრცელება საეჭვოდ დაემთხვა ფარცხალაძესთან ინციდენტს და ის დამოუკიდებლად უნდა გამოეძიებინათ.

საქართველოს შინაგან საქმეთა სამინისტრომ აღნიშნული ინციდენტის გამოძიების შუალედური შედეგები გმოაქვეყნა. უწყების ინფორმაციით, ნეიტრალური მოწმეების გამოკითხვით დადგინდა, რომ ინციდენტის დროს პირველმა ხელი ლაშა თორდიამ მოიქნია და არა ფარცხალაძემ.