საპრეზიდენტო არჩევნების მეორე ტურამდე, ბიძინა ივანიშვილი საქართველოს მოქალაქეებს მიმართავს და ამბობს რომ ესმის მათი გულგატეხილობისა და იმედგაცრუების. ბიძინა ივანიშვილის მიმართვის 6-წუთიანი ვიდეო დღეს, 5 ნოემბერს პარტია ქართულმა ოცნებამ გაავრცელა:

"მესმის, რომ უკმაყოფილო ხართ, რადგან ზოგიერთი მოხელე ხალხზე ზრუნვაზე მეტად, პირად კეთილდღეობაზე ზრუნავს, უკმაყოფილო ხართ, რადგან ფიქრობთ რომ დღევანდელმა ხელისუფლებამ ვერ მოახერხა სამართლიანობის აღდგენა. ბევრი თქვენთაგანი გაბრაზებულია, რადგან დასაშვები გავხადეთ მოძალადე რეჟიმის უკან დაბრუნების საფრთხე. დღეს ყველაზე მნიშვნელოვანია, რომ ჩვენი სამშობლო ისევ ისტორიულ გზაგასაყარზე დგას".

ივანიშვილის თქმით, რამდენიმე თვის წინ ის პოლიტიკაში პრობლემების გამწვავების გამო დაბრუნდა: "აღმოჩნდა, რომ ხალხი კიდევ უფრო ნათლად ხედავდა ამ პრობლემებს. დღეს არ შემიძლია არ დაგეთანხმოთ".

ქართული ოცნების "ამომრჩეველთან შერიგება"

არჩევნების შედეგების გამოცხადების შემდეგ პრემიერ მინისტრმა მამუკა ბახტაძემ განაცხადა, რომ ხელისუფლებამ ქართული საზოგადოებისგან მიიღო მკაფიო გზავნილი მათ დაშვებულ შეცდომებზე. ამიტომ, მეორე ტურის წინ მმართველმა პარტიამ "ამომრჩეველთან შერიგება" გადაწყვიტა.

პარტიაში ამისთვის სხვადასხვა გზები განიხილეს. მაგალითად, დეპუტატი კარლო კოპალიანმა განაცხადა, რომ თუ "ხალხს მოეფერებიან" და მათი პრობლემებით დაინტერესდებიან, მეორე ტურში აუცილებლად გაიმარჯვებენ.

პრემიერმა კი მთავრობის სხდომაზე განაცხადა, რომ სოციალურად დაუცველ ბავშვებს დახმარებას 10 ლარიდან 50 ლარამდე გაუზრდიან.

ხელისუფლებამ გაითვალისწინა საქართველოს საპატრიარქოს ინტერესებიც და პატრიარქთან შეთანხმებით, მეორე ტურის წინ მარიხუანის კულტივაციის კანონპროექტი გაიწვია. კიდე ერთი ინიციატივა, რომელიც მეორე ტურის წინ მმართველმა გუნდა დააანონსა საკონსტიტუციო სასამართლოს გადაწყვეტილებების შეზღუდვაა.