მმართველი პარტიის მხარდაჭერილი კანდიდატის, სალომე ზურაბიშვილის საარჩევნო კამპანიაში დაახლოებით 40 მომღერალი მონაწილეობდა. ჩაიწერა კლიპი და სპორტის სასახლეში ზურაბიშვილის დასკვნით ღონისძიებაზე შესრულდა სიმღერა.

ამ კამპანიაში მონაწილეობისთვის მომღერლებისთვის 142,9-დან 600 ლარამდე ჰონორარია გათვალისწინებული. აღნიშნული მონაცემები საარჩევნო შტაბმა აუდიტის სამსახურისთვის მიწოდებულ დოკუმენტში ვალდებულებად (გადასახდელ თანხად) ასახა. თანხის დანიშნულებად "საკონცერტო პროგრამის შესრულებაა" მითითებული.

ერთ-ერთი ვისთვისაც 500-ლარიანი ჰონორარია გათვალისწინებული საზოგადოებრივი მაუწყებლის აჭარის ტელევიზიის წამყვანი, მომღერალი სოფო ხალვაშია. როგორც ის On.ge-ს უყვება, კამპანიაში მონაწილეობა უანგაროდ, ყოველგვარი გასამრჯელოს გარეშე მიიღო. ისვე განმარტავს, რომ რაიმე თანხაზე შეთანხმება არ შემდგარა.

როგორც ის განმარტავს, მისი ინფორმაციით, საარჩევნო კამპანიაში უანგაროდ მონაწილეობა არ შეიძლება და ჰონორარი, სავარაუდოდ, ამ მიზეზითაა გათვალისწინებული.

ხალვაშის მსგავსი ჰონორარი ჩაერიცხებათ: სალომე ბაკურაძეს, ნინო ქარსელაძეს, ელენე ფოჩხუას, თემურ თათარაშვილს, მარიკა თხელიძეს, თიკა ჯამბურიას, არჩილ მეფარიძეს, ჯემალ სეფიაშვილს, ცისანა სეფიაშვილს, არჩილ ნიჟარაძეს, ბადრი დოიჯაშვილს, რომან რცხილაძეს, ბექა ჩხაიძესა და ლევან მგალობლიშვილს.

500-500-ლარიანი ჰონორარია განსაზღვრული ჯგუფი ქუჩის ბიჭების მომღერლებისთვის, ირაკლი ნოზაძისა და პაატა ხაჩიძისთვის. 250-250 ლარია გათვალისწინებული ანსამბლ ფორტეს სოლისტებისთვის: ზურაბ მანჯავიძისთვის, ირინე კახნიაშვილისთვის, მანანა მაისურაძისა და ნინო ახობაძისთვის. ანსამბლ შვიდკაცას თითოეული წევრს კი 143 ლარს გადაურიცხავენ.

ღონისძიებაში მონაწილეობისთვის 600-ლარიანი ჰონორარია გათვალისწინებული პაატა გულიაშვილისთვის, არჩილ ფურცელაძისთვისა და სალომე გოგიაშვილისთვის.

მომღერლებს გივი ბაკურაძეს, გრიგოლ აბესაძეს, დავით კიკაბიძეს, ზურაბ ბაკურაძეს, იასონ მეუნარგიას, კახაბერ გრიგალაშვილსა და ლევან ვეშაპიძეს 571-571 ლარს ჩაურიცხავენ. 200-ლარიანი ჰონორარია გათვალისწინებული არჩილ ბერიძისთვის, გიორგი დავითიანისა და ალექსანდრე კობახიძისთვის.

უშუალოდ ღონისძიების მუსიკალური პროგრამისა და სცენარის უზრუნველყოფისთვის 1 000 ლარია განსაზღვრული ბაკურ ბაკურაძისთვის.

შემაჯამებელ წინასაარჩევნო შეხვედრაზე სიმღერისთვის აჭარის საზოგადოებრივი მაუწყებელის მენეჯმენტის გადაწყვეტილებით, დისციპლინური საქმის წარმოების დასრულებამდე დილის გადაცემას მომღერალი სოფო ხალვაში აღარ წაიყვანს. ამის შესახებ ტელევიზიამ 25 ოქტომბერს გაავრცელა განცხადება.