აჭარის საზოგადოებრივი მაუწყებელის მენეჯმენტის გადაწყვეტილებით, დისციპლინური საქმის წარმოების დასრულებამდე დილის გადაცემას მომღერალი სოფო ხალვაში აღარ წაიყვანს. ამის შესახებ ტელევიზიამ დღეს, 25 ოქტომბერს გაავრცელა განცხადება.

ამ ფაქტზე აჭარის საზოგადოებრივი მაუწყებელმა დისციპლინური საქმის წარმოება დაიწყო. საკითხზე მაუწყებელი იმსჯელებს და საბოლოო გადაწყვეტილებას მიიღებს.

ადამიანური რესურსების მართვის სამსახურის უფროსმა, გია ქარცივაძემ აჭარის ტელევიზიას განუცხადა, რომ მაუწყებლის ნებისმიერ თანამშრომელს პოლიტიკური პარტიის მიერ ორგანიზებულ ღონისძიებებში მონაწილეობა ეკრძალება.

მაუწყებლის განცხადებაში ნათქვამია, რომ შაბათ-კვირას "დილის ტალღა" ეთერში გავა, მაგრამ მაუწყებლის მენეჯმენტის გადაწყვეტილებით, მას სოფო ხალვაში არ წაიყვანს, რადგან ამ ეტაპზე დისციპლინური საქმის წარმოება მიმდინარეობს.

ხალვაშმა მმართველი პარტიის, ქართული ოცნების მიერ მხარდაჭერილი პრეზიდენტობის კანდიდატის, სალომე ზურაბიშვილის შემაჯამებელ წინაარჩევნო შეხვედრაზე იმღერა. მომღერალი სოფო ხალვაში, რომელიც გადაცემა "დილის ტალღის" წამყვანია, თბილისში სპორტის სასახლეში გამართულ შეხვედრას დაესწრო.