მმართველი პარტიის ლიდერი, გია ვოლსკი აცხადებს, რომ პარტიის წევრის, გედევან ფოფხაძის განცხადება სამოქალაქო დაპირისპირების შესახებ ემოციური იყო და ამ კითხვებით გრიგოლ ვაშაძეს უნდა მიმართონ.

"ეს კითხვა უნდა დაუსვათ ვაშაძეს, რომელიც სწორედაც სამოქალაქო დაპირისპირებას გვპირდება, ინსტიტუტების ნგრევას, რომლის უფლებამოსილებაც არ გააჩნია და ამ ნანგრევებზე ძველი ხელისუფლების აშენებას. აი ეს არის ფაქტი", — განაცხადა ვოსლკიმ On.ge-სთან საუბრისას. მან ასევე აღნიშნა, რომ ცალკეული დეპუტატების განცხადება, არ ნიშნავს ხელისუფლების დამოკიდებულებას, თუმცა თავადაც ფოფხაძის აზრი გაიმეორა.

"რეალურად დესტაბილიზაცია არის მთავარი არსი, მთვარი პათოსი, რომელიც გასდევს წინასაარჩევნო აქტივობებს, რომელიც ნაციონალურ მოძრაობას აქვს" — აღნიშნა ვოსლკიმ.

დღეს, 30 ოქტომბერს ქართული ოცნების დეპუტატმა, გედევან ფოფხაძემ განაცხადა, რომ თუ გრიგოლ ვაშაძე საპრეზიდენტო არჩევნებს მოიგებს, ეს იქნება რეალური ნაბიჯი სამოქალაქო ომის დასაწყებად. მისი თქმით, ამაში დარწმუნებული იყო და საფუძველს აძლევდა ნაციონალური მოძრაობის რევანშისტული განწყობა.

სალომე ზურაბიშვილის საგანგებო ბრიფინგის დასრულების შემდეგ ჟურნალისტებთან საუბრისას, ქართული ოცნების გენერალურმა მდივანმა, კახა კალაძემ განაცხადა, რომ არანაირი სამოქალაქო ომი არ დაიწყება და ამის გარანტი ხელისუფლება იქნება.