ქართული ოცნების დეპუტატმა, ბექა ნაცვლიშვილმა განაცხადა, რომ საპრეზიდენტო არჩევნებში ნაციონალურ მოძრაობას კარგი შედეგისთვის არ მიუღწევია, ქართულმა ოცნებამ მიაღწია ცუდ შედეგს:

"ნაციონალურმა მოძრაობამ კი არ მოიპოვა ხალხის მხარდაჭერა, ქართულ ოცნებას დააკლდა ამომრჩეველი და, შესაბამისად, მისი მხარდაჭერა და ეს ამის შედეგი".

ცესკომ ხმების 100% დაითვალა. მონაცემების მიხედვით, საქართველოში მეორე ტური ხელისუფლების მხარდაჭერილ კანდიდატ სალომე ზურაბიშვილსა და გაერთიანებული ოპოზიციის კანდიდატ გრიგოლ ვაშაძეს შორის გაიმართება. ცესკომ წინასწარი მონაცემების განახლებული შედეგები გამოაქვეყნა.

შედეგები ასე გადანაწილდა:

  • სალომე ზურაბიშვილი (ხელისუფლების მხარდაჭერილი კანდიდატი) — 38,64%;
  • გრიგოლ ვაშაძე (ძალა ერთობაში) — 37,74%;
  • დავით ბაქრაძე (ევროპული საქართველო) — 10,97%;
  • შალვა ნათელაშვილი (ლეიბორისტული პარტია) — 3,74%;
  • ზურა ჯაფარიძე (გირჩი) — 2,26%;
  • დავით უსუფაშვილი (შენების მოძრაობა) — 2,26%.

გუშინ, 28 ოქტომბერს ეგზიტპოლების გამოცხადების შემდეგ, ევროპული საქართველოს საპრეზიდენტო კანდიდატმა, დავით ბაქრაძემ განაცხადა, რომ მეორე ტურში გაერთიანებული ოპოზიციის კანდიდატს, გრიგოლ ვაშაძეს დაუჭერს მხარს. ვაშაძეს მხარდაჭერა გამოუცხადა რესპუბლიკურმა პარტიამაც.