ცესკოს ინფორმაციით, დათვლილია ხმების 99,57 პროცენტი და წინასწარი მონაცემებით მეორე ტური გაიმართება, რადგან ვერც ერთმა კანდიდატმა 50 პროცენტზე მეტი ვერ მიიღო.

მმართველი გუნდის მიერ მხარდაჭერილ კანდიდატს, სალომე ზურაბიშვილს ხმების 38,66 პროცენტი აქვს მიღებული. გაერთიანებული ოპოზიციის კანდიდატმა, გრიგოლ ვაშაძემ კი 37,7 პროცენტი აქვს მიღებული.

რაც შეეხებათ დანარჩენ კანდიდატებს, დავით ბაქრაძეს აქვს 10,97 პროცენტი, შალვა ნათელაშვილს — 3,76%; დავით უსუფაშვილს — 2,26%; ხოლო ზურაბ ჯაფარიძეს — 2,26%.

სამი ეგზიტპოლი და სამი შედეგი

საქართველოში საპრეზიდენტო არჩევნები დასრულდა და სამი ეგზიტპოლის მიხედვით, სამი სხვადასხვა შედეგი დაიდო.

მმართველი პარტიის ეგზიტპოლით, 52,3 %-ით მათმა მხარდაჭერილმა კანდიდატმა, სალომე ზურაბიშვილმა გაიმარჯვა. მათი თქმით, 28,1 % აქვს გაერთიანებული ოპოზიციის კანდიდატს, გრიგოლ ვაშაძეს და 9,2% ევროპული საქართველოს კანდიდატს, დავით ბაქრაძეს. ფსიქოპროექტმა 100 უბანზე 5104 ადამიანი გამოკითხა. ცდომილების ფარგლები 2.6%-ია.

ევროპული საქართველოს ეგზიტპოლით მეორე ტური იმართება. კერძოდ, 37% აქვს გრიგოლ ვაშაძეს და 34% სალომე ზურაბიშვილს. პარტიის კანდიდატს, დავით ბაქრაძეს 17% აქვს, შალვა ნათელაშვილს კი — 4. კომპანია BCG-მ 105 საარჩევნო უბანზე 6 000 ადამიანი გამოკითხა. მაქსიმალური ცდომილება 3%-ია.

რუსთავი 2-ის მიერ ჩატარებული ეგზიტპოლის შუალედური შედეგებითაც სალომე ზურაბიშვილს და გრიგოლ ვაშაძეს 40-40% ქონდათ, დავით ბაქრაძეს კი — 10%.

ამავე თემაზე: