ქართული ოცნების დეპუტატის, მამუკა მდინარაძის განცხადებით, საარჩევნო უბნების უმრავლესობაში კომისიის წევრები ნაციონალური მოძრაობიდან და სხვა ოპოზიციური პარტიებიდან არ მონაწილეობენ ფუნქციების გამანაწილებელ წილისყრაში.

მამუკა მდინარაძის თქმით, ეს საარჩევნო კანონმდებლობის დარღვევაა. მისივე თქმით, გუშინ 27 ოქტომბერს გვიან ღამით დაფიქსირდა რამდენიმე შემთხვევა, როდესაც ნაციონალური მოძრაობის წარმომადგენლები ცდილობდნენ უბანში შესვლას ვიდეოკამერების დამონტაჟების მიზნით, რაც ასევე ეწინააღმდეგება საარჩევნო კანონმდებლობას.

"რუსთავის ერთ-ერთ საარჩევნო უბანზე ტარდება ეგზიტპოლი, როგორც ქართული ოცნების, ისე ნაციონალური მოძრაობის პარტნიორი კვლევითი ორგანიზაციების მიერ. აღნიშნულ უბანზე ნაციონალური მოძრაობის კვლევითი ორგანიზაციების წარმომადგენლები ხელს უშლიან ჩვენი პარტნიორი ორგანიზაციის წარმომადგენლებს ეგზიტპოლის ჩატარებაში", — განაცხადა მამუკა მდინარაძემ ქართული ოცნების ოფისში გამართულ ბრიფინგზე.

საქართველოს პარლამენტის დეპუტატის თქმით, კანონმდებლობა დაირღვა ტელეკომპანია რუსთავი 2-ის ეთერშიც.

"პარტიულმა ტელევიზიამ უგულებელყო არჩევნების დღეს აგიტაციის აკრძალვის პრინციპი და გუშინდელი ღამე ანუ დღევანდელი დღე უკვე 12 საათიდან დაუთმო ჩვენს მიერ მხარდაჭერილი კანდიდატის ანტირეკლამას, ცილისწამებას და შეურაცხყოფას", — განაცხადა მდინარაძემ.

საქართველოს მეხუთე პრეზიდენტის ასარჩევად არჩევნები დაიწყო. საარჩევნო უბნები საქართველოში რვა საათზე გაიხსნა და პირველი ამომრჩეველიც დაფიქსირდა.

ცენტრალური საარჩევნო კომისიის ინფორმაციით, არჩევნები 3 703 უბანზე ტარდება. მათ შორის 55 საზღვარგარეთ, 11 კი საგამონაკლისო წესით შექმნილი უბანია. ცესკოში ამბობენ, რომ ამომრჩეველთა საერთო რაოდენობა 3 518 877 ადამიანს შეადგენს, რომელშიც შედის საზღვარგარეთ რეგისტრირებული 14 795 მოქალაქე.

საკუთარი არჩევანი უკვე დააფიქსირეს ევროპული საქართველოს პრეზიდენტობის კანდიდატმა, დავით ბაქრაძემ, საქართველოს პრემიერ-მინისტრმა მამუკა ბახტაძემ, ასევე შს მინისტრმა გიორგი გახარიამ და ნაციონალური მოძრაობის ერთ-ერთმა ლიდერმა ნიკა მელიამ, ასევე საქართველოს ყოფილმა პრემიერ-მინისტრმა, გიორგი კვირიკაშვილმა.