ბათუმში ოთხი წლის გოგოს მკვლელობაში ბრალდებულს სასჯელის სახით უვადო თავისუფლების აღკვეთა განესაზღვრა. ამის შესახებ ინფორმაციას მთავარი პროკურატურა ავრცელებს.

უწყების ცნობით, დაკავებულმა უცხო ქვეყნის მოქალაქემ მის საცხოვრებელ სახლში ჩაბარებულ გოგოს მრავლობითი, სიცოცხლისთვის სახიფათო დაზიანებები მიაყენა, რის შემდეგაც ის ადგილზე გარდაიცვალა. პროკურატურის ცნობით, შემთხვევა 2018 წლის 13 ივნისს მოხდა.

დაკავებულს ბრალი საქართველოს სისხლის სამართლის კოდექსის 109-ე მუხლის მეორე ნაწილის "ბ" ქვეპუნქტით და მესამე ნაწილის "ბ" ქვეპუნქტით ჰქონდა წარდგენილი. ეს მუხლი გულისხმობს წინასწარი შეცნობით, უმწეო მდგომარეობაში მყოფი არასრულწლოვნის განზრახ მკვლელობას, ჩადენილი განსაკუთრებული სისასტიკით.