ქუთაისის საერთაშორისო აეროპორტის ინფორმაციით, განგაში ცრუ აღმოჩნდა. თვითმფრინავი გადაყვანილია სადგომზე და მიმდინარეობს მგზავრების ჩასხდომა.

Wizz Air-ის საქართველო-პოლონეთის რეისი თვითმფრინავში ბომბის შესაძლო არსებობის გამო რუმინეთში საგანგებოდ დაეშვა.

თვითმფრინავი Airbus A320 ქუთაისიდან ვარშავაში მიფრინავდა, როცა მიმართულება შეიცვალა და იძულებული გახდა, რომ ბუქარესტში ავარიულად დაშვებულიყო. Daily Mail-ის ცნობით, ბომბის თვითმფრინავში არსებობის შესახებ ქუთაისის აეროპორტში ქალმა დარეკა.

Daily Mail ადგილობრივ მედიაზე დაყრდნობით წერს, რომ 173-ვე მგზავრის ევაკუაცია განხორციელდა და ყველა მათგანი უსაფრთხოდაა, ადგილობრივი მთავრობა ამოწმებს თვითმფრინავს და ბარგს ბორტზე.

On.ge-ს საქართველოს შინაგან საქმეთა სამინისტროში განუცხადეს, რომ გამოძიება სისხლის სამართლის კოდექსის 313-ე მუხლით დაიწყო, რაც ცრუ შეტყობინებას გულისხმობს.

On.ge დამატებითი დეტალების გარკვევის მიზნით, აეროპორტების გაერთიანებასთან ცდილობს დაკავშირებას.