საერთაშორისო გამჭვირვალობა — საქართველოს ანგარიშის მიხედვით, 2018 წლის პირველი ივნისიდან 20 ოქტომბრამდე ადმინისტრაციული რესურსების გამოყენების თვალსაზრისით რამდენიმე ნეგატიური ტენდენცია გამოიკვეთა. ორგანიზაციის მიერ გამოქვეყნებულ შალედურ ანგარიშში წერია, რომ განსაკუთრებით პრობლემურია შემდეგი საკითხები:

• საბიუჯეტო ორგანიზაციებში დასაქმებული თანამშრომლების საარჩევნო კამპანიაში ჩართვა;
• საოლქო და საუბნო კომისიების დაკომპლექტების პროცესი;
• მაღალი თანამდებობის პირების მიერ ადგილობრივი სადამკვირვებლო ორგანიზაციების დისკრედიტაციის მცდელობები.

აღსრულებითი ადმინისტრაციული რესურსების საარჩევნო მიზნით გამოყენება

საერთაშორისო გამჭვირვალობა — საქართველოს ანგარიშის მიხედვით, იმ ადამიანთა სიები, რომლებიც საოლქო და საუბნო კომისიებში უნდა დანიშნულიყვნენ, რამდენიმე შემთხვევაში წინასწარ გავრცელდა. არასამთავრობო აღნიშნავს იმასაც, რომ შესაძლოა, მმართველი პარტია წევრების შერჩევაში აქტიურ მონაწილეობას იღებდეს.

ორგანიზაცია წერს, რომ საარჩევნო კამპანიებში ძალადობის შემთხვევები თითქმის არ ყოფილა, მიუხედავად იმისა, რომ სალომე ზურაბიშვილის ამომრჩევლებთან შეხვედრებზე ხშირად გვხვდებოდა ოპოზიციის მიერ კონტრაგიტაციის შემთხვევები. ამასთან, არასამთავრობო ქუთაისის საკრებულოში მომხდარ ინციდენტს იხსენებს, როცა ნაციონალური მოძრაობის წევრს სალომე ზურაბიშვილის მხარდაჭერებისთვის შეურაცხყოფის მიყენების გამო დაუპირისპირდნენ.

ანგარიშში წერია, რომ შესაძლოა, პროკურატურამ ბადრი პატარკაციშვილის მკვლელობის მცდელობის საქმე გახსნილად რუსთავი 2-ის მიერ გამოქვეყნებული ფარული ჩანაწერების გადაფარვის მიზნით გამოაცხადა, რაც მმართველი პარტიის მიერ ნაციონალური მოძრაობის დისკრედიტაციის მცდელობაა.

საერთაშორისო გამჭვირვალობა — საქართველო ერთ-ერთ მნიშვნელოვან პრობლემად სახელმწიფო ინსტიტუტების მხრიდან სადამკვირვებლო ორგანიზაციებზე განხორციელებულ ღია თავდასხმებს მიიჩნევს. ამის მიზეზად აღნიშნული ორგანიზაციების საარჩევნოდ დისკრედიტირება სახელდება. არასამთავრობოს მაგალითად მოჰყავს თეა წულუკიანის განცხადებები და ირაკლი კობახიძის შეფასებები, როცა მან "სადამკვირვებლო ორგანიზაციების ხელმძღვანელები, ფაქტობრივად, ფაშისტებთან გაათანაბრა".

ამასთან, ანგარიშში წერია, რომ საქართველოს კომუნიკაციების მარეგულირებელმა კომისიამ მაუწყებლებს კვლევების გაშუქების კუთხით კანონთან შეუსაბამო მოთხოვნები წაუყენა. ორგანიზაცია კონკრეტულ პოლიტიკურ რეკლამებთან კომისიის პოზიციებს გაუგებრად მიიჩნევს და ამბობს, რომ გადაწყვეტილებები შესაძლოა, შეგნებულად იყო მიკერძოებული.

ინსტიტუციური ადმინისტრაციული რესურსების საარჩევნო მიზნით გამოყენება

საერთაშორისო გამჭვირვალობა აღნიშნავს, რომ იყო საბიუჯეტო ორგანიზაციებში დასაქმებულთა მობილიზაციისა და მხარდამჭერთა სიების შეგროვების იძულების შემთხვევები. არასამთავრობო ორგანიზაცია მიიჩნევს, რომ დაფიქსირდა უკანონო აგიტაციის შემთხვევებიც, რასაც რეაგირება არ მოჰყოლია.

სამართლებრივი ადმინისტრაციული რესურსების საარჩევნო მიზნით გამოყენება

ორგანიზაციის პოზიციით, 2017 წლის შემდეგ საარჩევნო კომისიების ახალი წესით დაკომპლექტება მმართველ პარტიაზეა მორგებული და ამის მუშაობის შედეგები 2018 წლის საპრეზიდენტო არჩევნებზე უნდა გამოვლინდეს.

ფინანსური ადმინისტრაციული რესურსების საარჩევნო მიზნით გამოყენება

ანგარიშში წერია, რომ დაკვირვების პერიოდში საარჩევნო კოდექსის დარღვევა არ გამოვლენილა და საარჩევნოდ მოტივირებული ხარჯების მხრივაც განსაკუთრებით პრობლემური ტენდენცია არ ყოფილა.

რეკომენდაციები

არასამთავრობო ორგანიზაცია აღნიშნული ხარვეზების აღმოფხვრისთვის კონკრეტულ უწყებებს შემდეგ რეკომენდაციებს სთავაზობს:

• ხელისუფლებამ სადამკვირვებლო ორგანიზაციების დისკრედიტაციისგან თავი უნდა შეიკავოს;
• უნდა დაიწყოს უწყებათაშორისი კომისიის რეფორმირების საკითხებზე დისკუსია;
• უნდა შემუშავდეს საარჩევნო კომისიის კანდიდატთა შერჩევის ისეთი პროცედურები, რომლებიც თანამდებობებზე პოლიტიკური პარტიების აქტივისტების დანიშვნის შანსებს მინიმუმამდე დაიყვანს;
• საბიუჯეტო ორგანიზაციის ხელმძღვანელებმა საჯარო მოხელეების წინასაარჩევნო აგიტაციაში უკანონო ჩაბმისგან თავი უნდა შეიკავონ;
• კომუნიკაციების მარეგულირებელმა ეროვნულმა კომისიამ საკუთარი გადაწყვეტილებები კანონის ჩარჩოებში უნდა მოაქციოს;
• პროკურატურა და შინაგან საქმეთა სამინისტრო რომელიმე პოლიტიკური ძალის დისკრედიტაციისთვის არ უნდა გამოიყენონ;
• უნდა დაიწყოს საარჩევნო კომისიების დაკომპლექტების წესის საფუძვლიანი რეფორმირება.