ჰააგაში საქართველოს მიერ 2008 წლის აგვისტოს ომის დანაშაულის შესახებ შეტანილ სარჩელზე რუსეთის წინააღმდეგ რუსეთმა მოამზადა საპასუხო სარჩელი, რომელშიც არგუმენტებად მოყვანილია ციტატები სალომე ზურაბიშვილის წიგნიდან. ამის შესახებ ევროპული საქართველოს პრეზიდენტობის კანდიდატმა, დავით ბაქრაძემ ბრიფინგზე განაცხადა.

ბაქრაძემ აღნიშნა, რომ მათ აქვთ დოკუმენტის ნაწილი, რუსეთის საპასუხო სარჩელიდან, რომელზეც არგუმენტის სახით პირდაპირ არის მითითებული მმართველი გუნდის მიერ მხარდაჭერილი საპრეზიდენტო კანდიდატის, სალომე ზურაბიშვილის წიგნი. საპარლამენტო უმცირესობის თქმით, დოკუმენტი ადასტურებს რამდენად საშიშია ზურაბიშვილის რუსული რიტორიკა ქვეყნისთვის.

"კერძოდ, ამ ფრაგმენტში რომელიც ჩვენ მოვიყვანეთ მითითებული არის 137–139 გვერდები, ის მოსაზრებები რომელიც მას აქვს ჩამოყალიბებული", — განაცხადა ბაქრაძემ.

ამასთან დაკავშირებით კითხვა დაუსვეს თბილისის მერს, კახა კალაძეს. მან 2008 წელს აგვისტოს ომის დაწყებაში ისევ ერთიანი ნაციონალური მოძრაობა დაადანაშაულა.

"ნაციონალურ მოძრაობას, თქვენს ტელევიზიას [რუსთავი 2-ს], თქვენს ხელმძღვანელებს არანაირი მორალური უფლება არ გაქვთ ისაუბროთ ომზე იმიტომ, რომ თქვენ იყავით ერთ-ერთი მთავარი მონაწილე იმის, რომ ჩვენ დავკარგეთ ტერიტორიები, დავკარგეთ უამრავი ადამიანის სიცოცხლე", — აღნიშნა თბილისის მერმა.

საქართველოს სარჩელი რუსეთის წინააღმდეგ ჰააგაში

საქართველოს ხელისუფლებამ სისხლის სამართლის საერთაშორისო სასამართლოში რუსეთის წინააღმდეგ სარჩელი 2008 წლის 12 აგვისტოს შეიტანა. ჰააგის სასამართლოს პროკურორმა 2015 წლის 13 ოქტომბერს მიმართა წინასასამართლო პალატას, რომ 2008 წლის აგვისტოს ომის ფარგლებში ჩადენილ დანაშაულებებზე გამოძიება დაეწყოთ.

რუსეთი უარს აცხადებს ითანამშრომლოს ჰააგის სისხლის სამართლის საერთაშორისო სასამართლოსთან საქართველო–რუსეთის 2008 წლის ომის დანაშაულის გამოძიების შესახებ.

გაიგეთ მეტი: