გირჩის საპრეზიდენტო კანდიდატის, ზურა ჯაფარიძის თქმით, კრიმინალურმა პოლიციამ იაგო ხვიჩია ჩხრეკისთვის განყოფილებაში ძალით გადაიყვანა

პოლიტიკური გაერთიანება გირჩი 20 ოქტომბერს მარიხუანის ლეგალიზების აღსანიშნავი ფესტივალის გამართვას გეგმას. დედა ენის ბაღში მისული ხალხი, მათ შორის ტურისტებიც მარიხუანის ყიდვასა და მოხმარებას თავისუფლად შეძლებენ.

"სავარაუდოდ ასე ცალ-ცალკე წაგვიყვანენ ყველას, სავარაუდოდ, ვახოსაც [მეგრელიშვილს] წაიყვანენ და მეც წამიყვანენ", — აღნიშნა ჯაფარიძემ.

მისივე თქმით, დედა ენის ბაღში ფესტივალისთვის აპარატურა ვერ შეაქვთ.

"სავსე არის პოლიციით აქაურობა, მათ შორის, უკან იუსტიციის სახლის პარკინგი სავსეა ავტობუსები პოლიციელებით", — ამბობს ჯაფარიძე ფეისბუქლაივის დროს.

ჯაფარიძის თქმით, მიუხედავად ყველაფრისა კანაფის ლეგალიზაციის ფესტივალი ჩატარდება. On.ge იაგო ხვიჩიას გადაყვანასთან დაკავშირებით პასუხს ელოდება შინაგან საქმეთა სამინისტროსგან.

შინაგან საქმეთა სამინისტრომ 19 ოქტომბერს პარტია გირჩის წევრები და საპრეზიდენტო კანდიდატი, ზურაბ ჯაფარიძე გააფრთხილა, რომ კანონდარღვევის შემთხვევაში, ზომებს მათ მიმართაც გაატარებენ.

შსს აცხადებს, რომ თუკი ადგილი ექნება ნარკოტიკული საშუალების გასაღებას, ფლობას, მოხმარებას თუ პოპულარიზაციას, პოლიცია სამართალდამრღვევი ყველა პირის მიმართ გაატარებს კანონმდებლობით გათვალისწინებულ ზომებს.

სამინისტრო გირჩის განცხადებებს აფასებს, როგორც დანაშაულის ორგანიზების განზრახვას, სამართალდარღვევების ჩადენისაკენ მოწოდებას და მოქალაქეთა წახალისებას ჩაებან კანონსაწინააღმდეგო საქმიანობაში.

გირჩის განცხადების საფუძველზე, სამინისტრომ უკვე დაიწყო გამოძიება საქართველოს სისხლის სამართლის კოდექსის 273-ე პრიმა მუხლის მე-2 და მე-8 ნაწილებით, რაც კანაფის ან მარიხუანას უკანონო შეძენა-შენახვას და გასაღებას გულისხმობს.