შინაგან საქმეთა სამინისტრო კიდევ ერთხელ ეხმაურება დაგეგმილ მარიხუანის ლეგალიზების აღსანიშნავ ფესტივალს. უწყება პარტია გირჩის წევრებსა და საპრეზიდენტო კანდიდატ, ზურაბ ჯაფარიძეს აფრთხილებს, რომ კანონდარღვევის შემთხვევაში, ზომებს მათ მიმართაც გაატარებენ.

შსს აცხადებს, რომ თუკი ადგილი ექნება ნარკოტიკული საშუალების გასაღებას, ფლობას, მოხმარებას თუ პოპულარიზაციას, პოლიცია სამართალდამრღვევი ყველა პირის მიმართ გაატარებს კანონმდებლობით გათვალისწინებულ ზომებს.

"მოვუწოდებთ მოქალაქეებს, მათ შორის პოლიტიკური გაერთიანება გირჩის წარმომადგენლებს, შეწყვიტონ სამართალდარღვევებისკენ მოწოდება, თავი შეიკავონ პროვოკაციული განცხადებებისგან და სამართალდარღვევების ჩადენისგან. წინააღმდეგ შემთხვევაში, პოლიცია გამოიყენებს კანონით განსაზღვრულ მის ხელთ არსებულ ყველა ბერკეტს სამართალდარღვევების აღსაკვეთად", — ნათქვამია უწყების განცხადებაში.

შინაგან საქმეთა სამინისტრო გირჩის განცხადებებს აფასებს, როგორც დანაშაულის ორგანიზების განზრახვას, სამართალდარღვევების ჩადენისაკენ მოწოდებას და მოქალაქეთა წახალისებას ჩაებან კანონსაწინააღმდეგო საქმიანობაში.

გირჩის განცხადების საფუძველზე, სამინისტრომ უკვე დაიწყო გამოძიება საქართველოს სისხლის სამართლის კოდექსის 273-ე პრიმა მუხლის მე-2 და მე-8 ნაწილებით, რაც კანაფის ან მარიხუანას უკანონო შეძენა-შენახვას და გასაღებას გულისხმობს.

პარტია გირჩის მიერ დაანონსებულ მარიხუანის ლეგალიზების ფესტივალს შინაგან საქმეთა სამინისტრო პირველად 13 ოქტომბერს გამოეხმაურა.

პოლიტიკური გაერთიანება გირჩი ხვალ, 20 ოქტომბერს მარიხუანის ლეგალიზების აღსანიშნავი ფესტივალის გამართვას გეგმას. პარტიის წევრის, იაგო ხვიჩიას თქმით, დედა-ენის ბაღში მისული ხალხი, მათ შორის ტურისტებიც მარიხუანის ყიდვასა და მოხმარებას თავისუფლად შეძლებენ.