ზაზა სარალიძემ და მალხაზ მაჩალიკაშვილმა მხარდამჭერებთან ერთად მთავარ პროკურატურასთან აქცია-პერფორმანსი "ნუ გვაბოლებთ" გამართეს. მათ პროკურატურასთან სიმბოლურად ფერადი ბოლი გაუშვეს.

როგორც სარალიძე ამბობს, მათ სურთ მთავარ პროკურორს, შალვა თადუმაძეს თავი შეახსენონ. მისივე თქმით, პროკურატურა, სავარაუდოდ, მირზა სუბელიანისა და ვიქტორ ჯაფარიძის მონაწილეობით აუდიოჩანაწერის გავრცელებით დათო სარალიძისა და თემირლან მაჩალიკაშვილის გამოძიებების გადაფარვას ცდილობს.

"ვეძებთ ჩვენი შვილის მკვლელებს, ჩვენ კი ვიცით ვინ არიან ჩვენი შვილის მკვლელები. ათას რამეს იგონებენ, სუბელიანმა თვითმკვლელობა სცადაო. მაგ სისულელეს ნეტავ ვის სჯერა", - განაცხადა სარალიძემ.

სარალიძე და მაჩალიკაშვილი ერთ თვეზე მეტია პარლამენტის წინ აქციას ატარებენ. ისინი ითხოვენ, რომ მათი შვილების მკვლელობის საქმე გამოიძიონ და დამნაშავეები დაისაჯონ.