ავსტრალია შესაძლოა, აშშ-ს მიბაძოს და თავისი საელჩო ისრაელში თელ-ავივიდან იერუსალიმში გადაიტანოს. ინიციატივა ქვეყნის ახალმა პრემიერ-მინისტრმა, სკოტ მორისონმა გააჟღერა.

როგორც The Guardian წერს, ავსტრალიის პრემიერი ევანგელისტი ქრისტიანია. ჟურნალისტები დაინტერესდნენ, ხომ არ უკავშირდება პრემიერის გადაწყვეტილება მის სარწმუნოებას.

"ჩემი რწმენა და რელიგია ამ გადაწყვეტილებასთან კავშირში არ არის", — განაცხადა მორისონმა. მისივე თქმით, პალესტინასა და ისრაელს შორის სტატუს-კვო არ გაუმჯობესებულა.

აშშ-მა თელ-ავივიდან იერუსალიმში საელჩოს გადატანა მას შემდეგ გადაწყვიტა, რაც ქვეყნის პრეზიდენტმა, დონალდ ტრამპმა ქალაქი ისრაელის დედაქალაქად აღიარა. საელჩო 14 მაისს გაიხსნა, რასაც პალესტინელების პროტესტი მოყვა. აშშ-ის მსგავსად იერუსალიმში საელჩოს გადატანა გადაწყვიტა გვატემალამაც.

აშშ-ის ამ გადაწყვეტილებამ მუსლიმური ქვეყნები გააღიზიანა. ისლამური თანამშრომლობის ორგანიზაციამ, რომელშიც 57 მუსლიმური ქვეყანა არის გაერთიანებული, იერუსალიმი პალესტინის დედაქალაქად გამოაცხადა.

21 დეკემბერს, გაერთიანებული ერების ორგანიზაციამ აშშ-ის პრეზიდენტ დონალდ ტრამპის გადაწყვეტილება იერუსალიმის ისრაელის დედაქალაქად აღიარების შესახებ დაგმო, 128 ხმით 9-ის წინააღმდეგ. ხოლო, 35-მა სახელმწიფომ, როგორიცაა კანადა, მექსიკა და ავსტრალია კენჭისყრაში მონაწილეობა არ მიიღო. თავი შეიკავა საქართველომაც.