ისლამური თანამშრომლობის ორგანიზაციის (OIC) წევრებმა, რომლებიც სტამბოლში, თურქეთის პრეზიდენტ რეჯეპ ტაიპ ერდოღანის ინიციატივით შეიკრიბნენ, აღმოსავლეთ იერუსალიმი პალესტინის დედაქალაქად გამოაცხადეს. მათი თქმით, პალესტინის დედაქალაქი ამჟამად ოკუპირებულია ისრაელის მიერ. OIC-მ მოუწოდა დანარჩენ მსოფლიოს, გაიზიარონ მათი გადაწყვეტილება და აღმოსავლეთ იერუსალიმი პალესიტნის დედაქალაქად აღიარონ.

OIC-ის წევრები მიიჩნევენ, რომ ამერიკის შეერთებული შტატები ამიერიდან ვერ იქნება მედიატორი ისრაელ-პალესტინას შორის რამდენიმე დღის წინ იერუსალიმის ისრაელის დედაქალაქად აღიარების გამო. მათ მოუწოდეს აშშ-ს, უკან წაიღოს თავისი აღიარება.

ისლამური თანამშრომლობის ორგანიზაცია 57 სახელმწიფოს აერთიანებს, რომელთა ლიდერები სტამბოლში 13 დეკემბერს შეიკრიბნენ. ისინი ერდოღანმა მოიწვია ტრამპის მიერ იერუსალიმის ისრაელის დედაქალაქად გამოცხადების შემდეგ. ტრამპმა ამის შესახებ 6 დეკემბერს განაცხადა. მან სახელმწიფო დეპარტამენტს მოუწოდა, უზრუნველყოს აშშ-ს საელჩოს გადატანა თელ-ავივიდან იერუსალიმში.