2018 წელს ოჯახში ძალადობისთვის 16 პოლიციელი ამხილეს. ამის შესახებ საუბარია შსს-ს ადამიანის უფლებათა დეპარტამენტის ანგარიშში, რომელიც დეპარტამენტის დირექტორმა ლონდა თოლორაიამ დღეს, 9 ოქტომბერს წარადგინა.

გარდა ამისა, ოჯახში და ქალთა მიმართ ძალადობის ფაქტებზე არასათანადო რეაგირებისთვის სამინისტრომ 8 პოლიციელს დისციპლინური სახდელი დააკისრა.

დეპარტამენტის ანგარიშში, ასევე, აღნიშნულია, რომ ოჯახში და ქალთა მიმართ ძალადობის ფაქტებზე არასათანადო რეაგირების გამო, 2018 წელს დისციპლინური სახდელი დაეკისრა რვა პოლიციელს.

შინაგან საქმეთა სამინისტროს სტატისტიკით,

  • 2017 წელს გამოძიება დაიწყო 2828 საქმეზე, ხოლო 2018 წლის 9 თვეში — 4 339 საქმეზე;
  • 2017 წელს სისხლისსამართლებრივი დევნა დაიწყო 1986 პირის მიმართ, ხოლო 2018 წლის 9 თვეში — 3000-მდე პირის მიმართ;
  • 2017 წელს გამოცემულ იქნა 4370, 2018 წელს კი - 5472 შემაკავებელი ორდერი.

გარდა ამისა, აღნიშნულია, რომ შემცირდა შემაკავებელი ორდერის დარღვევის შემთხვევები.

  • 2017 წელს შემაკავებელი ორდერების დარღვევის მაჩვენებელი იყო — 9 პროცენტი, 2018 წლის 9 თვეში — 6 პროცენტი, ხოლო 2018 წლის სექტემბერში (რისკის შეფასების ინსტრუმენტის ამოქმედების შემდეგ) — 4 პროცენტი.