მაია ოთინაშვილი, რომელიც რამდენიმე დღის წინ რუსმა სამხედროებმა ხურვალეთში დააკავეს, ოკუპირებული ცხინვალის ციხიდან პირობით გაათავისუფლეს. ე.წ. სასამართლო პროცესი დღეს, 9 ოქტომბერს გაიმართა.

ამის შესახებ დე ფაქტო რესპუბლიკის საინფორმაციო სააგენტო რეს იუწყება. ოთინაშვილის გათავისუფლების შესახებ ინფორმაცია On.ge-ს საქართველოს სახელმწიფო უსაფრთხოების სამსახურშიც დაუდასტურეს.

რეს-ის ცნობით, მაია ოთინაშვილი დამნაშვედ სცნეს საზღვრის უკანონო გადაკვეთის ბრალდებით. სააგენტოს ინფორმაციით, მოსალოდნელია, რომ მას ქართულ მხარეს დღეს გადასცემენ.

მაია ოთინაშვილი რუსმა სამხედროებმა 29 სექტემბერს გაიტაცეს. ის ქმართან და სამ შვილთან ერთად გორში ცხოვრობს. სახალხო დამცველის ინფორმაციით, რამდენიმე დღის განმავლობაში, ოჯახის წევრებს არ ჰქონდათ საკმარისი ინფორმაცია დაკავებულის ზოგადი მდგომარეობის და უსაფრთხოების შესახებ.

მისი გათავისუფლებისთვის გააქტიურებული იყო ცხელი ხაზი და ინფორმირებულები იყვნენ საერთაშორისო ორგანიზაციები.

ხურვალეთი გამყოფი ხაზის სოფლებს შორის ერთ-ერთი ყველაზე მეტად დაზარალებული სოფელია. მავთულხლართების გავლების შედეგად სოფლის 36 ჰა სასოფლო სამეურნეო მიწა, საძოვრები, სასაფლაო და რამდენიმე სახლი ოკუპირებულ ნაწილზე მოექცა, სარწყავი წყალი 2008 წლიდან გადაკეტილი აქვს დე ფაქტო ხელისუფლებას, ადამიანების გატაცებები და დაკავებები თითქმის ჩვეულ მოვლენად იქცა.

მაია ოთინაშვილი ხურვალეთიდან უკვე მე-5 დაკავებული ქალია.